Roniştişê qerarî yê sîyasetmedarê kurdî Kenan Ayazî yo ke Kibris ra îadeyê Almanya bi, Mehkemeya Eyaletî ya Hamburgî de ame kerdene.Cezaya 4 serran û 3 mengan dîyaye Ayazî.

Verê roniştişî verê mehkeme de mîtîngê paştdayîşê bi Kenan Ayazî ame kerdene. Bi desan kesî tewrê mîtîngî bîyî. Nuştox û aktîvîsta cinî Anja Flach vat Kenan Ayazî bi pawitişê xo dersa merdimîye daye heyetê mehkeme.

Heyetê mehkeme bi îdîya mabanê tarîxanê 2018-2019î de mîyanê PKKyî de berpirsîyarîya pîle girewta xo ser û na narçawe de xebiteyayo cezaya 4 serran 3 mengan daye Kenan Ayazî.

Kenana Ayazî bi nîşanê serkewtişî cewabê qerarê mehkeme da û nê vatî: ''Mehkemeya şima seba ke Erdoganê dîktatorî şa bikero ceza dana mi. Ceyaza şima çend bena wa bibo ez dewaya xo ya azadîye canêverdena.Şima bi paştdayîşê Erdoganî paştî danê DAÎŞî. No paştdayîş Solingen de, Mannheim de sey mergê şarê şima agêreno. Mehkemeya şima terorê Erdogan û DAÎŞî nêvînayîşî ra yena la ma muhakeme kena ke rayîranê demokratîkan ra waştişê xo anê ziwan.''

Badê eşkerakerdişê qerarî grûba 40 kesan ke salona mehkeme de bi slogananê “Bijî Serok Apo” û  “Jin Jiyan Azadî” nêrazîbîyayîşê mojna.

Avûkatê Kenan Ayazî Stefan Kuhnî qerar sey skandal name kerd û vat ê do zereyê hewteyêkî de vera qerarî îtîtaz bikerê.

Wekîla Partîya Çepe ya Hamburgî Cansu Ozdemir zî vat: ''No qerar nîno qebulkerdene, skandal o.Mehkeme bi nê qerarî reyna rejîmê Erdoganî kerd şa.''