Cezaya 9 serran û 9 mengan dîyaye rojnamegerê rojnameyê Yenî Yaşamî Îbrahîm Karakaşî.

Îbrahîm Karakaşo ke 6ê teşrîna peyêna 2020î de Adana de amebi tepiştene û rîyê falîyetanê rojnamegerîye ra yeno muhekemekerdene roniştişê dewaya ci ya qerarî ame kerdene.

Roniştiş Mehkemeya Cezaya Girane ya 11.  ya Adana de ame kerdene. Karakaş Zîndanê Kurkçulerî yê Adana ke tede sey rehînî yeno tepiştene ra bi sîstemê SEGBÎSî tewrê roniştişî bi. Avûkatê Karakaşî Tugay Bek zî mehkeme de hazir bi.

Dozgerîye bi îdîaya ''endamîya rêxistine'' waşt ke ceza bidîyo Karakaşî. Heyetê mehkemê vatişê şahîdan, û arşîvê xeberanê ke  Karakaşî kerdî sey delîlê sûcî girewtî dest û Cezaya 9 serran û 9 mengan daye Karakaşî.