Endamê Meclîsê Ciwanîye yê HDPyî Ezgî Orak û Hatîce Aras rîyê zextê polîsan ra muracatê Komeleya Heqanê Merdiman a Anqara kerd. Cinîyan ke paştdayîşo huqûqî waşt bi kombîyayîşê çapemenîye derheqê babete zanayîş da.

Ezgî Orak vat: ''Polîsan rayîrê mi birna û derheqê tay embazanê mi yê xebatkaranê partî de zanayîş waşt. Înan waşt ke pê zorî numarayê telefonê xo bidê mi.  Polîsan mi ra vat 'ma zanê to zî sekena' û karê min o legal sey îlegal ramojna û mi wina sûcdar kerd. Înan reyna mi pê vatişê 'ma do ti vînê û hesabê çîyanê ke ti kena bipersê' mi tehdît kerd. Hela ke ez hêrs bîya mi vat şima mi tacîz kenê înan vat 'xeymê ma de nîyo. No karê ma yo, ma hêzê xo dewlete ra genê.' ''

Orake bale ante ser ke a wextê destbenkerdişî de zî raştê cipêsayîşê bêhuqûyî ameya û vat: ''Ma zanê ke nê polîtkayê cumkerdişî û tacîzî vera heme cinîyan ê ciwanan bi hawayêkê sîstematîkî yenê reyraberdene. Vanê ma hêzê xo dewleta ra genê la ganî ê bizanê ke ê do nê polîtîkayan ra netîce nêgerê.''

Hatîce Aras zî ard ziwan ke polîsan 11ê çeleyî de a verê berê ci de vindarnaya û seba  ke aye înan de qiseykerdiş red kerd înan a girewta binê teqîbî û tehdît kerda.  Arase vera polîtîkaya ajankerdişî hêrsê xo ard ziwan û vat ê se kenê wa bikerê do nêeşkê verê mucadeleyê ciwanan bigerê.

Endama Heyetê Rayberdişî yê ÎHDyî Nuraye Çevîrmen zî ard ziwan ke demê peyên de muracatê wînayênî înan rê zaf yenê kerdene û vat: '' Bi nê caardişan sûc yeno kerdene. Qedexeyê îşkence  û muameleyê xirabî yeno binpaykerdene. Ganî nê caardişî cade bêrê wedaritene.''