Platformê Cinîyanê Demokratîkan yê Almanya ke xeylê rêxistinê cinîyan tede ca gênî, da eşnawitene ke ê do bi siloganê ‘Erdogano qatil ti xeyr nêameyî!‘ çalakîyan virazî û Erdogan şermizar bikerî.

Platformî bi eşkerayîyêk seba tewrbîyayîşê çalakîyan veng da û wina va: "Zîhnîyetê faşîstî yê dewleta tirkî bi polîtîkaya hesran û gonîye wazeno ke pay ra bimano. Ma cinîyî qet nê îtîfaqê lêşinî qebûl nêkerd û do nêkerî."

Eşkerayîye de Almanya rê dewetkerdişê Erdoganî sey hêrîşêk vera kurdan de û hêzanê demokrasî rê hesibîya û ame vatene ke; sere de hukmatê Merkele û dima ra yê ke vera dîktatorîya Erdoganî de bêveng î, heme ortaxê nê sucî yê.

Cinîyan dîyar kerd ke seba ke Almanyaye Erdogan dawet kerdo, ê nê kerdenanê Almanya ra şermîyenê û Almanyayêka wina nêwazenê.

Eşkerayîye bi nê vengdayîşî qedîyaye: "Ma sey Platformê Cinîyanê Demokratîkan yê Almanya zîyaretê Erdoganî yê Almanya protesto kenî û sere de cinî û pêroyê şaran ra wazenê ke wa vera dîktator Erdoganî de bivejyî kuçeyan û meydanan de vera nêheqîye de vengê xo berz bikerî."

Rêxistinê cînîyan ke platformî de ca genî, tayê ci wina yî: "Yewîya Ciniyanê Kurdan ya Almanya (YJK-E), Yewîya Cinîyanê Sosyalîstan (SKB), Tevgerê Cinîyanê Demokratan yê Ewropa (ADKH), Cinîya Newe, FEDA Cinî, Însîyatîfê Cinîyan yê Îslamî, Yewîya Cinîyanê Êzidîyan, Cinîyê Gencî, Buroya Aştîye ya Cinîyan.