Cinîyê ke Îstanbul de vera destsernayîşê Şaredarîya Colemêrgî serkêşîyê çalakîya nobete kenê, nînan vat: ''Ma do rayîr nêdê qeyûman.''

Vera destsernayîşê Şaredarîya Colemêrgî Hêzanê Kede, Haştîye û Demokrasîyî Îstanbul de Meydanê Şîşhane de çalakîya nobete dabî destpêkerdene. Vizêr nobete bi beşdarîya Têgêrayîşê Cinîyan ê Azadan (TJA) û Meclîsê Cinîyan ê DEM Partî dewam kerd. Çalakîye de sloganê ''Cinîyî seba Colemêrgî payan ser de yê'' ameyî cayene. Cinîyan tîşortê bi nuşteyê ''Qeyûm def be'', ''Jin, Jiyan, Azadî'' xo rê dayî.

Meclîsê Cinîyan ê Sosyalîstan (SKM) Serpîle Topal dîyar kerd ke hişmendîya serdestîya camêrdan wazena bi polîtîkayanê qeyûman îradeyê cinîyan bişikna û vat: ''Ma xoverdayîşê cinîyan berz bikerê û hetê Colemêrgî de bibê.''

Sekretera Platformê 'Ma do Verê Kişîyayîşê Cinîyan Bigêrê' (KCDP) Fîdane Ataselîm vat: ''Hêrişê şarê kurdî û îradeyê cinîyan kenê. Ma do verê ney de vinderê û ser bikewê.''

Nan û Gule ra Elîf Turgut vat: ''Bi rayîrê qeyûman warê cinî û domanan yenê tengkerdene. Ma ney qebul nêkenê.''

Meclîsê Cinîyan ê Keskî ra Nazîfe Bayrak vat: ''Ma do destûr nêdê ke heqê kurdan bêrê xespkerdene. Ma sey cinîyan rayîr nêdê qeyûman.''

Partîya Şorişgêre ra Gamze Taşçi vat: ''Ma sey cinîyan nê waran de bêrê têhet û vera qeyûman xo ver bidê.''

Hemsereka DADî Kadrîye Dogan vat: ''Qeyûm yeno manaya çinkerdişê komel, cinî û domanan. Ma do vera qeyûman têkoşînêkê xurtî bikerê.''

Çalakîye de Dengbêje Xalîde kilamî vatî û cinîyan pîya govende girewte.