Têgêrayîşê Cinîyan ê Kurdan ê Ewropa  (TJK-E)  semedê wedaritişê tecrîdê serê Rayberê Şarê Kurdî Abdullah Ocalanî û azadîya ci bajarê Strasbourgî yê Fransa de rayraşîyayîş û mîtîng kerd.

TJK-E çarçewaya hemleya ''Abdullah Ocalanî rê azadîye, meseleya kurdan rê çareserîya sîyasîyE'' de meydanê Kleberî yê Strasbourgî de çalakîye kerde. Xeylêk welatanê Ewropa ra cinîyî tewrê çalakîye bîyî. Cinîyan verî meydanê bajarî de bi sloganan rayraşîyayîş kerd û dima ra waro ke mabênê Konseya Ewropa, Parlamentoyê Ewropa û CPT de yo, mîtîng ame kerdene. Cinîyê ke bi pankartan vera dezgehanê Ewropa bîyî rêz verî marşa Ey Raqîbî vat û dima semedê şehîdan rêz ame girewtene.

Wekîla HDPyî ya verêne  Feleknas Uca Konseya Ewropa sey hemkarê sûcê  tecrîdî name kerd û vat: ''Ma veng danê Konseya Ewropa; Heqê pêvînayîşî yê her tepişteyî est o, qey yê Abdullah Ocalanî çîn o? Ma veng danê CPTyî;Tirkîya qey destur nêdana şima raporanê xo eşkera bikerê? Çi nimnenî? Heta ke berê Îmraliyî qefilnayebî têkoşîn û xoverdayîş do dewam bikero.”

Helena Dersima ke bi nameyê TJK-E fransizkî qeisey kerd, vat: ''Waştişê ma zaf zelal û eşkera yo. Ma wazenê Rayberê xo ra xebere bîgerê. Pêkerdişê ke morê şima binê ci de yo, şertanê ci bîyarê ca.  Heta ke cewabê persanê ma bêrê dayene ma tîya de yê, ma do tim tîya de bi.”

Vervatoxa YJK-E Kezban Dogan zî vat, ''Rixmo ke heyetê CPTyî nêşi Îmrali vat ê şîyî. Rayberê ma binê tecrîdê giranî de yo. Azadîya Rayber Apoyî azadîya ma ya. Heta ke Rayber Apo azad mebo ne cinîyê kurdan ne komelê kurdan û ne zî Rojhelatê Mîyanênî de çew eşkeno qala heq û edaletî bikero. Ma semedê cinîyan ê kurdan heta azadîya Rayber Apoyî do çalakîyanê xo bidomnê. Cuyeya bê Rayber Apoyî ma rê herim a.”