Rîyê poltîkayanê şerî yê îqtîdarê AKP-MHPyî ra krîzê ekonomîkî her roje xorîyêr bena. Her roje zem beno û feqîrîye xorîyêr bena. Cinîyan û ciwanan ê amedijan derheqê krîzî de ANFyî rê qisey kerd.

Deniz Pişkin: Polîtîkayê şerî tesîrê her warê cuye kenê. Ma sey ciwanan nêeşkenê tewrê aktîvîteyanê komelkî bibê û bigêrê. Çîyê winayên hinî bîyî luks. Berpirsîyarê problemanê ekonomîkî dewelet a, dewletbîyayîş o, îqtîdar o. Ganî hinî şar vera nê vengê xo berz bikero. Şar çend bêveng bimano zextê dewlete hende zêdîyenê. Nane bîya 18 lîra. Eke şar vera nê vengê xo nêvejo,xora polîtîkaya dewlete dewam kena.

 Nizamettin Urgay: Her kes qala ekonomî keno. La welat de edalet çîn o. Xora cayo ke tede edalet çîn bo, krîzo ekonomîk beno. Tay pastaya girde wenê, tay zî çopan ra leteyan arê danê. Xora bêadeletîye na ya. Seba ke şer est o şarî xapînenê.Wextê prosesê çareserîye de hêvîya şarî zêdîyaye bî. Ganî masaya çareserîye newera bêro ronayene û haştîye bêro. Semedê qedîyayîşê problemanê ekonomîkî ganî masaya haştîye bêro ronayene. Eke Tirkîya masaya çareserîye de Birêz Ocalanî reyde ronişo bi xo bena hêzdar.

Hatice Karadag: Ma nêeşkenê îdareyê xo bikerê. Her roje krîz xurtêr beno. Mêrdeyê mi nêweş o û ez mecbûr îdareyê keyeyî kena. Hinî merdim nêeşkeno gure zî bivîno. Şertê cuye her roje giranêr benê. Ez nêeşkena masrafanê tutanê xo bîyarê ca.

Yasemine Gul:  Ma nêeşkenê bigêrê. Waştişê ma est ê la rîyê problemanê ekonomîkî ra ma nêeşkanê bîyarê ca.  Ma cinîyî rîyê problemanê ekonomîkî ra keye de ameyî hepskerdene. Sebebê nê problemanê hukmat o. Her çî rê tim zem beno. Ma nêeşkenê vejîyê teber. Ganî hinî tay çîyî bêrê bedilnayene.  Êyê ke cor de ronişenê ganî bikewê mîyanê şarî û bi xo bivînê ke şar senî tengayî anceno.  Heta bi xo mevînê, nêeşkenê problemanê çareser bikerê.

Berdan Çelik: Tesîro tewr pîl yê krîzê ekonomîkî yê serê ciwanan barkerdiş o. Ciwanî nêeşkenî gure bivînê. Coka verê xo danê rojawanî ya zî şinê Ewropa. Bajarê ma benê veng. Ez vana dewlete bi zanayîşî nê kena. Wina kena ke ciwanî şirê. Sebebê krîzê ekonomîkî şerê Tirkîya yê vera kurdan o. Her roje bi desan teyaraye şerî wirzenî. Hukmat ganî xerckerdişê xo yê leşkerî de tasaruf bikero. Butçeyo ke dîyeno şerî ganî bidîyo şarî.