Hemşaredarê Colemêrgî Mehmet Siddik Akişo ke hetê îqtîdarê AKP-MHPyî ra wezîfeyê ci ame xespkerdene û herinda ci de qeyûm ame cakerdene, cezaya 19 serran û 6 mengan dîyaye ci. Badê qerarî şar vejîya kuçeyan.Şar bi sloganan Zextî nêeşkenê verê ma bîgêrê, çepik û tîlîlîyan qerarî protesto keno.

Hemsereka Pêroyî ya DEM Partî Tulaye Hatimogullari, Hemserekê Pêroyî yê DBPyî Çîgdeme Kiliçgun Uçar û Keskîn Bayindir û wekîlê DEMî pîya bi şarî kuçeyanê Colemêrgî de yê.

Tulaye Hatimogullari badê rayraşîyayîşî verê Walîtîya Hakkarî de eşkerayîye danê. Hatimogullari vera hêrişê polîsan hêrsê xo ard ziwan û vat ê do gerreyê polîsan bikerî û vat: ''Wa Erdogan û Bahçelî bêrê şarê Colemêrgî bivînê. Şarê Colemêrgî wayîrê îradeyê xo yo ke 31ê adare mojna ra vejîyeno.''

Badê qiseykerdişê Hatimogullari heyetê DEM Partî û DBPyî verê Walîtîya Hakkari de nobete daye destpêkerdene.