Colemêrg de vera destsernayîşê şaredarîye DEM Partî bi şîarê ''Şaredarîyî yê şarî yê, ma do destûr medê destsernayîşî'' mîtîng  ame kerdene.

Hemserekê DEM Partî yê Bajarî Kadir Şahînî qiseyekerdişê spasî kerd. Hemşaredara Colemêrgî Vîyane Tekçe qisey kerd û Hemşaredar Mehmet Siddik Akiş û tepişteyanê sîyasîyan rê selam şawitî.

Dima mesajê Hemşaredarê Colemêrgî Mehmet Siddik Akişî ame wendene. Akişî vat: ''Şarê Colemêrgî yo bianor, seba ke şima wayîrê îradeyê xo vejîyenê, bi hewayêkê qerardarî xover danî ez şima bi hurmetî selam kena. Bedelê ci çi beno wa bibo ma do xover bidê.''

Temsîlkarê partîyanê ke tewrê mîtîngî bîyî înan zî qiseykerdişêk kerd. Qiseykerdişan de vera polîtîkaya qeyûmî nêrazîbîyayîş ame mojnayene û semedê wayîrvejîyayîşê îradeyê şarî mesajê xoverdayîşî ameyî dayene.

Hemserekê Pêroyî yê DBPyî Keskîn Bayindirî vat: ''Ma bêhêz nîyê û seserrî yo vera nînan têkoşîn kenê. Bi mîlyonan dostê ma est ê. Ma pê şarê xo bawer ê. Ma do heta peynî xover bidê. Ma nê ê tengayî de yê.  Şarê ma her ca de têkoşîn keno. Çew nêeşkeno verê ma bîgêro.  Ma do wayîrê heme bajaranê xo bivejîyê. Colemêrg çirey têna nîyo. Ma do miheqeq ser bikewê.''

Aktîvîsta TJA Adalete Fîdan zî nê vatî: ''Îradeyê şarê kurdî, ziwan û nasname û têkoşînê ci nas nêkeno. Polîtîkayê qeyûmî vera şarê kurdî û têkoşînê cinîyan dişmenîye ya. Qeyûm dizdîye û talan o. Ma sey cinîyan bedelê ci çi beno wa bibo ma do wayîrê destkewteyanê xo bivejîyê. Ma veng danê heme cinîyan. Roje roja pîya têgêrayîş û serkewtişî ya.''

Hemsereka Pêroyî ya DEM Partî Tulaye Hatimogullari zî nê vatî: ''Ma tîya vera qeyûmî xover danê.  Ma vera dizdanê ke îradeyê ma diznayo xover danê. Huqûqo bêhuqûq ê Anqara yo ke vano 'Kurdî nêeşkenê xo îdare bikerî ,kurdî hemwelatîyê nê welatî nîyê'  ma xover danê. Anqara goş bidê vengê Colemêrgî. Vengê tîlîlî û xoverdayîşî yê Colemêrgî bieşnawê. Na derbeya sîyasî ya. Ma çirey qebûl nêkenê.  Çend rojî verî gama ke ma tîya verê walîtîye de eşkerayîye daye lekşkerî kerdî kuçeyan. Na eynî wextî de derbeya leşkerî ya.Ganî qeyûm cade peyser game bierzo û xespkerdişî ra destê xo bianco. Meclîsê Şaredarîye Vîyane Tekçe vîjnaye. Hemşaredara ma Vîyane Tekçe ya. Wa pêroTirkîya bizano, Anqara bizano, Qesr bizano ma do bi xoverdayîşî ser bikewê. Ma do bi peşatdayîş, yewbîyayîş û têkoşînî ser bikewê.'' 

Hemserekê Pêroyî yê DEM Partî Tuncer Bakirhanî zî nê vatî: ''Erdoganî semedê destsernayîşê şaredarîye vato 'ma huqûq ardo ca.' Raşto. Kurdîstan de vera kurdan huqûqêk aneêca.  La no huqûqê dişmenîye yo. Koyê ci qedexe kenê, wareyê ci qedexe kenê, ziwanê ci qedexe kenê, îradeyê ci qedexe kenê, îradeyê ci xesp kenê, hemşaredarê ci erzenê zîndan, yew zî vanê no huqûq o.  No huqûqê dişmenîye yo. Pêro kurdî, kedkarî, muxalîf û sosyalîstî nê zaf hol zanê. Ma do vera nê têkoşîn bikerê. Ma reyna vanê şima Kurdîstan de yewna huqûqî anê ca. Nê dişmenê ma yê. Dişmenê koyê ma Zap ê, dişmenê Sumbul ê. Nê dostê ma nîyê. Ma do çirey vera huqûqê dişmenîye peyser game merze. Ma do sey Seyîd Rizayan, Şêx Seîdan, sey Mazlûman, Mahîran, Denîzan, Îbrahîman û Sakîneyan do xover bidê. Vanê derheqê hemşaredarê ma de cipersayîş est o. Hûma belayê şima bido. Derheqê kam yew kurdî/e de ciperasyîş çîn o? Senî ke ma vizêr Wanî de xover da ewro ma Colemêrg de xover danê û ma do siba zî xover bidê.''

Badê qiseykerdişan mîtîng qedîya û bi hezaran kesî bi sloganna ver bi merkezê bajarî rayra şîyî.