Amadekarîya seba  Rayraşîyayîşê Demokrasîyî yê Vera Darbe yê HDPyî yo ke çarçewa 'Bernameyê Têkoşînê Demokratîkî' de 15ê hezîrane perrêkê ci Edîrne ra û perrêk zî Colemêrgî ra dest pêbikero, dewam kena. Xeylêk HDPyîjê ke do tewrê rayraşîyayîşî bibê, resayî Colemêrg. Yeno pawitene ke enmdamê Heyetê Rayberdişî yê Merkezî (MYK) û Meclîsê Partîye (MP), hemşaredarî û pêro rêxistinê HDPyî 14ê hezîrane de şaristan de amade bibê.

Rayraşîyayîş merkezê Colemêrgî de pê tewrbîyayîşê Hemserekê HDPyî Mîthat Sancar, Hemsereka DBPyî Salîha Aydenîz û Hemserekê KCDyî Sedat Şenogluyî do dest pêbikero. Hemserekê HDPyî yê Colemêrgî Sînan Kayayî îfade kerd ke seba rayraşîyayîşî înan bi rojan o ke amadekarîye kerde. Kayayî da zanayene ke ê do şarî reyde qasê kîlometreyêk şorê û startê rayraşîyayîşî bidê. 

Konvoy dima do bikewo Wan. 16ê hezîrane de esnaf, şar, rêxistinanê Wanî reyde pêvînayîş bêrê kerdene. 17ê hezîrane de zî girse do şoro Bedlîs. Hemserekê HDPyî Okkeş Kawayî vat înan amadekarîya xo qedînaye û Wan do bi coşêkî girse pêşwazî bikero.

Girse Bedlîsî ra dima do seba Amedî bikewo rayîr. Hemserekê HDPyî yê Amedî Rûmet Dursunî vat ê do konvoy şarî reyde pêşwazî bikerê û venga şarî da ke seba pêşwazîya konvoyî hetkarî bikero.