Dîrektorê Sekreterîya Neteweyî ya Central Sindical e Popular Consulat a Brezîlya û Endamê Têgêrayîşê Sosyalîst-Şorişgêrî yê Brezîlya (MRS) Matheus Crespoyî derheqê têkoşînê seba azadîya Rayberê Şarê Kurdî Abdullah Ocalanî de ANFyî rê qisey kerd.

Crespoyî ard ziwan ke êlule de Brezîlya de Torra Têkoşîn û Paştdayîşî ya Sendîkaya Mîyanneteweyîye kombîyayîşê xo kerdo û vat: ''Kombîyayîş de seba azadîya Abdullah Ocalan bira têkoşînî ameye girewtene. Ma bale ante na raştîye ser ke dewleta tirke wayîra taybetmendîyanê dîktatorîye ya, zulmê merdiman kena û hêrişê kurdan kena. Vera nê kerdişan pawitişê azadîya Ocalanî seba ma mecbûrî ya. Coka kombîyayîş de vernîyazê seba azadîya Ocalanî û têkoşînê ney ame qebulkerdene.

Ma tecrîdê vera Birêz Ocalanî sey binpaykerdişê heqanê merdiman qebul kenê. Tecrîd hetê huqûqî, sîyasî ra nêno qebulkerdene. Şert û merdê Îmraliyî peymananê mîyanneteweyîyan û Qanûnê Bingeyî yê Tirkîya binpay kenê. Hetê bînî ra bi tecrîdê vera Ocalanî yeno waştene ke têgêrayîşê kurdan bêra astengkerdene. Tecrîdê vera Abdullah Ocalanî beno sebeb ke vera dîktatorîya Erdoganî hêrsê şarî heqdar bibo. Ma qebul nêkenê ke merdimî sebebanê sîyasîyan ra bitepişîyê. Coka azadîya Abdullah Ocalanî seba ma zaf girîng a. Heta ke Abdullah Ocalan azad nêbo demokrasî do nêşora Tirkîya.''

Crespoyî bale ante Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û vat: ''Ma na hemle ercîyaye vînenê. Ma sey aktîvîstanê heqan ê enternasyonalîstan seba azadîya Abdullah Ocalanî û pêro tepişteyanê sîyasîyan qerardar ê ke têkoşîn bikerê. Serkewtişê kurdan, serkewtişê pêro şaranê bindestan o.''