Komeleyanê Elewîyan ê Demokratîkan (DAD) panelêkî ra dima Meydanê Taksîmî yê Îstanbulî de Seyîd Riza û embazê ci serrgêra 84. ya îdamanê înan de bi eşkerayîyêke yad kerdî. Wekîlê HDPyî Alî Kenanoglu û Zeynel Ozen zî tewrê eşkerayîye bîyî.

Hemserekê DADî yê Îstanbulî Alî Şekerî çalakîye de qisey kerd û waşt ke gorê Seyîd Riza û embazanê ci bêrê eşkerakerdene û dewlete wa Terteleyê Dêrsimî de têrî biba.

Wextê qiseykerdişê Şekerî de polîsanê tirkan xîret kerd ke eşkerayîye asteng bikerê û vat ke wa pankarta bi nuşteyê 'Bawerîya ma Rayberê ma yê, Rayîrê ma Rayberê ma yo, Xoverdayîşê ma Îqrarê ma yo' bêra wedaritene.Rixmê astengkerdişê polîsan zî  Îdarekaranê DADî ra Nergîze Guzel eşkerayîye wende.

Guzele vat: ''Ma 84 serrî yo sey warîsanê înan rayberanê xo yê bêkefenan yad kenê. Kefenê înan tîje û aşme yê. Erdê Dewrêsî ê verara xo de nimitê. Pîran û Dêrsimî ma rê tarîxêko winasên nêverda ke ma milê xo bikerê çewt. Coka ma sey Munzurî bêmabên, sey Duzgun Baba pay ra û sereberz şinê. Wa komara Tirkîya hînî tarîxê xo dir têrî biba. Ma pîrê xo Seyîd Riza û yarananê ci bi minet û hûrmetî yad kenê. Ma tewirê înan ê rûmetênî rê îman kenê. Ma îfade kenê ke ma pê îqrarî pabesteyê têkoşînê înan ê. Gorê înan binê her dare û kerra yo. Erdê Dewrêsî mekanê nîyazê ma yo.''