Seba ke xutbeyo kurdkî wendo 9 endamê Komelaya  Paştdayîş û Hetkarî ya Alîmanê Dînî (DÎAY-DER) ameybî tepiştene. Komeleya Elewîyan ê Demokratîkan (DAD) semedê paştdayîşî DÎAY-DER zîyaret kerd.

Zîyareto ke banê komele ya Bahçelîevlerê Îstanbulî de ame kerdene de bi kurdkî û tirkî pankarta ''Dîn haştîye, waybiratîye û seyyewbînîye'' yo ameye akerdene.

Pîrê Komeleya Kulturî yê Pîr Sultan Abdalî Mehmet Karabulutî ard ziwan ke ganî heme rengî bi hewayêkê azadî bêrê ramojnayene û vat: ''Senî îbadetê ziwanî dayîke beno sûc. Hûna têna erebkî zano, kurdkî nêzano? Nê. Şar ganî tim heqê xo yê ziwanê dayîke de îbadetkerdişî bipawo.''

Meclîsê Pîran ê DADî ra Îbrahîm Erdoganî zî vist vîrî ke ê tim vera nê zîhnîyetî têkoşîn kenê û vat: ''Çew/e nêeşkeno ziwanê hûmayî qedexe bikero. Nê polîtîkayanê asîmîlasyonî yê înan hinî hedê xo ra vejîyayî. Îqtîdar ma nêvînayîşî ra yeno, vera nayî ganî ma bibê yew û hêzê xo pîl bikerê.''

Serekê Cemxaneyê Gazî Haşîm Kizildereyî zî tepiştişê semedê xutbeyê kurdkî sey zulumî hesibana û vat komelî ganî rîyê dîn û bawerîyan xo ra nêrê sûcdarkerdene.