Parlamentera HDPyî ya Amedî Dersime Dag vat polîtîkayê zorbazîye yê hukmatê AKP-MHPyî do nêeşkê destkeweyê HDPyî çin bikê û ê do têkoşînê xo dewam bikê. Dersime Dag ANFyî reyde qisey kerd û ard ziwan ke her roje bi desan endamê înan yenê destbenkerdene.

Dage vat: "Serra 2015î de teda û zorîya vera partîya ma reyna dest pêkerd.HDP kamyew şaristan de bihêz bo uca de zorî û teda kenê. Her cayê Tirkîya de heqê merdimî yenê binpaykerdene. Hêrişê vera partîya ma zî naye mojnenê. Her roj endamê ma yenê destbendkerdene û tepiştene. Armancê nê hêrişan têkilîya şarî bi HDPyî çinkerdiş o. Hukmat têna vera kurdan ney vera her muxalîfî hêriş kena.  Têna HDP  vera îqtîdarî muxalefet keno. Coka HDP beno hedefê hêrişan.

Hêrişê vera Vakur û Rojhelatê Sûrîye zî dewamê teda û zorî yê. Vera AKPyî hêrsêko pîl esto û AKP nêeşkeno xo verê nê hêrsî bêro. Hukmat hende kewt tengayîye ke çalakîyêka qijkeke ya cinîyan zî seba xo tehlûke vîneno. Cinîyan her ca de yewîya xo awan kerde û vera zorbazîye vejîyenê meydanan. Ciwanê partîya ma seba ke vilawekî vila kerdî ameyî destbendkerdene û tepiştene. Hukmat hendek qels bi ke tay mend ke birejo. Çend bikewo tengîye hendek hêrişê muxalefetî keno.

AKP wazeno HDP Kurdîstan de qels biko. Hînî Tirkîya de proses vurîya. Labelê ma hema taqîbkerdoxê Orhan Dogan û Vedat Aydin ê. AKP do şorê la ê kesê ke xo ver da do bimanê. Ma qet vera zulm û teda milê xo çewt nêkerd. Her çiqas teda, destbendkerdiş, tepiştişî û hêrişî bibê zî ma do gama xo apey nêerzê. Ma do her ca de rêxistina xo xurt bikê. Her tim zî ma do rîyê înan ê gemarinî rayaumûmîye rê eşkera bikê.''