Seba ke wekîlîyê Hemsereka Kongreya Komelê Demokratîkî (KCD) û wekîla Partîya Demokratîke ya Şaran (HDP) ya Colemêrgî Leyla Guven, û Wekîlê HDPyî yê Amedî Musa Farisogullariyî û Wekîlê CHPyî Enîs Berberogluyî ameyî destsernayene û dima ra ameyî tepiştene Kurdîstan û Tirkîya de şar vejîya kuçeyan.

Çewlîg, Dêrsim, Mêrdîn, Şirnex, Riha, Dîlok, Semsûr, Sêrt, Êlih,Wan, Bedlîs, Idîr, Agirî, Colemêrg, Istanbul, Çanakkale, Adana, Mersin, Antalya, Iskenderun, Manîsa,Denizli, Mugla, Aydin û xeylêk bajaranê bînan ê Kurdîstan û Tirkîya de şar vejî kuçeyan û seba ke îradeyê ci ameyo binpaykerdene hêrsê xo ard ziwan.

Çalakîyan de ame vatene ke hukmato faşîst se keno wa bikero do vera xoverdayîşê şaran bin bikewo. Qiseykerdişan de ame vatene ke hukmatê AKP-MHPyî  wazeno ko bi hêrişan payra bimano la ê pê nê hêrişan peynîya xo anê.  Reyna bale ameye antene wekîlanê tepişteyan ser û ame vatene ke ê îradeyê şarî temsîl kenê  û do şar wayîrê înan bivejîyo. Çalakwanann bi slogananê xoverdayîş ciwîyayîş o mesajê xurtkerdişê têkoşînî dayî.