Polîsanê tirkan serê sibayî eşt bînaya Partîya Herêmanê Demokratîkan (DBP) a Rezanê Amedî ser. Hemserekanê DBPyî  Salîha Aydenîz û Keskîn Bayindiriî verê bînaya partîye ya Rezanî de eşkerayîye daye. Wekîlê HDPyî yê Amedî Remzîye Tosun û Dersim Dag zî tewrê kombîyayîşî bîyî.

Hetkarê Hemserekanê DBPyî yê qeza  Mehmet Alî Altinkaynakî da zanayene  ke bînaya înan ameya serûbinkerdene û destnîyayo rojname, kovar û posteranê înan ser û vat nê hêrişî semedê qedînayîşê sîyasetê kurdan yenê kerdene la ê do ser nêkewê.

Salîha Aydenîz hêrişê vera DBPyî sey dişmenîya îqtîdarî ya vera kurdan name kerd û vat: ''Nê hêrişê vera kurdan sey operasyonêkê sîyasîyî yenê kerdene. Îqtîdar wazeno bi nê hêrişan verê kurdan bigêro la o bi destê xo xo qedîneno. Hêrişê înan ramojnenê ke peynîya înan senî nizdî bîya. Sîysetê kurdan semedê sîyasetê demokratîkî kerdo xo çeng la ê şer û pêkewtiş wazenê. Rojdemê înan de têna asîmîlekerdişê kurdan û tesfîyekerdişê sîyasetê kurdan esto. Senî ke îqtîdarê verênî vera kurdan ser nêkewtî nika ra tepîya zî do îqtîdarî ser nêkewê. Êyê ke wazenê bi planê çokdayîşî kurdan rê bidê vînîkerdene bi xo ameyî nûqtaya çokdayîşî. Seba ke kongreya ma bîya nizdî wazenê bi zextê mesaj bidê ma la ê se kenê wa bikerî do nêeşkê verê ma bigerê. Şima nêeşkenê ma biqedînê, şima do bi xo biqedîyê.''