Nuştox û rojnamegero kurd Musa Anter 20ê êlula 1992yî de Amed de amebi qetilkerdene. Roniştişê bire ya dewaya qetilkerdişê Anterî Mehkemeya Cezaya Girane ya Anqara de ame kerdene. Lajê Anterî Dîcle Anter, Hemseeekê HDPyî Mîthat Sancar, wekîlî, Hemvervaroxê Komîsyonê Huqûq û Heqanê Merdiman ê HDPyî, Hemserekê ÎHDyî  Ozturk Tukrdogan, Endama Heyetê Rayberdişî yê ÎHDyî Nuraye Çevîrmen, Hemserekê ÎHDyî yê Amedî Abdullah Zeytun, rojnameger-nuştox Huseyîn Aykol û temsîlkarê xeylêk rêxistin û dezgehan tewrê roniştişî bîyî.

Roniştiş bi tesbîtkerdişê nasnameyî dest pêkerd. Roniştiş de verî Hemserekê ÎHDyî Turkdoganî qisey kerd û vat: ''Dosyaya Anterî ganî dosyayanê bînan ra nêra cîyakerdene. Ganî na dewa çarçewa sûcanê vera merdimîye de esas bêra girewtene û nêkewa.''

Turkdoganî ra dima avûkatan qisey kerd û îfade kerd ke ê kiştoxan şinasnenê coka ganî dewa nêra betalkerdene.

Dima mektubê Wekîlê AKPyî Orhan Mîrogluyî ame wendene. Mektub de Mîrogluyî cînayet eşt milê PKKyî ser. Avûkatanê Anterî vera mektubê Mîrogluyî nêrazîbîyayîşê xo mojna. Avûkatan waşt ke ganî Mîroglu sey şahîdî nê sey vergumanî bêro goşdarîkerdene.

Serekê verênî yê Dayîreyê Kontraterorî yê MÎTî MEhmet Eymurî wexto ke sey şahîdî amebi goşdarîkerdene vatbi ke Mîroglu ajanê dewlete yo û nameyê ci yo qodî 'Tayfun' o.

Lajê Musa Anterî Dîcle Anterî zî wa mehkeme birêka edîle û bêterefe bida.

Qiseykerdişan ra dima meqamê îdîa waşt dewa wextvîyartişî ra bêra betalkerdene. Mabênî ra dima heyetê mehkeme bira xo eşkera kerde û bi bahaneya ke dewa ser o 30 serrî vîyartî dewa betal kerde.

Mehkeme waşt ke kontrolo edlî yê derheqê vergumanê dewa Hamît Yildirimî zî wa wedarîyo.

Roniştişî ra dima girseyî waşt ke eşkerayîye bido la polîsan Hemserekê HDPyî Sancar û wekîlî girseyî ra cîya kerd û girse girewt binê ablûqa. Mabênê polîsan û girseyî de alozîye vejîyaye. Girseyî dima verê Edlîye de eşkerayîye daye.

Sancarî eşkerayîye de qisey kerd û bale ante ser ke înan cara na bire pawitêne. Sancarî vat: ''Anter bi hawayêkê plankerdeyî hetê dewlete ra ame kiştene. Polîtîkaya bêcezaverdayîşî dewre de ya. Îqtîdarê AKP-MHPyî sey îqtîdaranê bînan na polîtîka ano ca. Na dosya ewro bêra qefilnayene zî ma do hesabê nê sûcan bipersê. No rîpel bi têkoşînê pêro hêzanê demokrasî bêro akerdene, newe ra. Ma do wayîrê mîras û vengê Apê Musayî vejîyê. No seba ma ferman o. Ma do têkoşînê raştîye û edaletî rê bi her hewayî dewam bikerê.''