Îstanbul de bi kombîyayîşê çapemenîye DEM Partî, Kongreya Demokratîke ya Şaran (HDK) û Têgêrayîşê Cinîyan ê Azadan (TJA) Deklarasyonê Newroza Îstanbulî eşkera kerd.

Deklarasyono ke hetê Vervatoxê HDKyî Cengîz Çîçekî ra ameyo wendene tede ame parekerdene ke faşîzmê AKP-MHPyî bi zorbazî keno ke elewî, kurdî, karkerî, cinîyî, bindestî û ciwanî îteatê ci bikerê la vera ci meşaleya Kawayê Asinkerî rayîrê têkoşînî roşnî keno. 

Deklarasyon wina dewam keno: ''Şarê kurdî emser Newroze bikerê adirê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye.' Tecrîd û îşkenceyê Îmraliyî dewamê kerdişanê Zîndanê Dîyarbekîrî yê. Senî ke o çax Kawayê Modernî Mazlûm Doganî rayîrê ma roşnî kerdbî ewro zî ma tecrîdê Îmraliyî bişiknê. 

Faşîzmê AKP-MHPyî polîtîkayanê vera kurdan ra pêro çimeyanê şarî pêşkêş keno, mabênê şaran de nîfaqan vejeno û şerî giranêr keno. Şerê ci yê vera Rojawan û Başûrê Kurdîstanî bîyo sebebê xizanîya şaran. 

Mesuldarîyê pêro hêzanê demokrasî û azadîye yê ke tecrîdê vera Birêz Ocalanî bişiknê. Wext wextê ci yo ke tarîtîya tecrîdî ma bi adirê Newroze roşnî bikerê. Wextê ci ameyo ke adirê Newroze têkoşînê şaran ê yewbîyayeyî roşnî bikero, hêvîya şaran gandar bikero û têkoşînê Komara Demokratîkî yew bikero.

Ma do seba tepişteyan, mexdûr û qurbananê erdlerzî, karkeranê madenî, wendekaran, xizanen, dadîyan, dewijan, tepişteyanê nêweşan û tepişteyanê grevê vêşanîye pîya biherikê Meydanê Newroze. 

Wext wextê şiknayîşê sîstemê Îmraliyî yo.

Wext wextê çareserîya meseleya kurdan û azadîya Abdullah Ocalanî yo.

Wext wextê ci yo ke ma seba azadî û serfîrazîye wurzê payan ser.''