Delegasyonê Haaştîye yê Mîyanneteweyî mîsyonê emserî înternetî ser o kerd. Kombîyayîşê  rojan ra dima eşkerayîye dîyaye û rapor ame amadekerdene.

Eşkerayîye ame vatene ke emser semedê janî ra delegasyon nêeşka bêro Tirkîya coka înternetî ser o ame pêser. Delegasyonî da zanayene ke ê armanc kenê ke mabênê Rayberê Şarê Kurdî Abdullah Ocalanî û selahîyetdaranê Tirkîya de newe ra prosesêkê çareserîye ronê.

Delegasyon vat: ''Seba naye şerto verên wedaritişê tecrîdê Îmraliyî yo. Heyetê ma verî seba ke Abdullah Ocalan bivîne Wezirê Edaletî reyde têkilîye ronaye. La hema cewab nêdîya ma. Ma rêxistinanê heqanê merdiman, sendîka, partîyanê sîyasîyan û temsîlkaranê huqûqî yê Abdullah Ocalanî reyde pêvînayîşî kerdî. ''

Heyetî pêvînayîşan ra nê netîceyî vetî:

-Şert û mercê esaretî yê zîndananê Tirkîya heqanê cinî, sendîkadar û sîyasîyan binpay kenê.

-Peymanê Mîyanneteweyî yê Konseya Ewropa zî yenê binpaykerdene. CPTyî raporê xo yê peyênî de pare kerdbi ke ganî cezaya muebede newe ra bêra ercnayene. Rapor hetê Meclîsê Wekîlan ê Konseya Ewropa ra zî ame îmzakerdene.

-Selahîyetdaranê tirkan tecrîdê Îmraliyî xorinêr kenê. 22ê nîsana 2020î ra nata Abdullah Ocalanî reyde pêvînayîşî nêame kerdene. CPTyî zîyaretê xo yê peyênî yê Tirkîya de zî nêşi Îmrali û rewşe çin hesibnaye.

-Serekê Mehkemeya Heqanê Merdiman ê Ewropa (MHME) zîyaretê xo yê Tirkîya de Zanîngehê Îstanbulî de doktoraya faxrî girewte. No nêzdîbîyayîşê MHME xoserî û bêterefgîrîya ci kena binê tehlukeyî.

-Zîndanan de unîformakerdeyî cinîyan tacîz kenê, Tirkîya de merdimî hetê polîsan ra yenê remnayene û vînîkerdene, merdimê muxalîfî pê terorîzmî yenê sûcdarkerdene û pê bahaneya janî şarî ser o teda yena kerdene.

-Seba şermezarkerdişê tecrîdê Îmraliyî 27ê teşrîna peyêne ra nata grevê vêşanîye yeno kerdene.Eke hukmatê tirkî cewab nêdo beno ke mergî do biqewimîyê.

-Tecrîd temamîya welatî ra vila bîyo û vilabîyayîşê na rewşe warêkê zaf hîrayî de mojneno ke dîktatorî mende bena.

Siyasetmedarê Îzlandayî Ogmundur Jonasson, avûkata îngîlîze Melanie Gingell, edîtora îtalyane Laura Quagliuolo, siyasetmedar û aktîvîste Skoç Roza Salih, Hetkarê Serekê 'Vera faşîzmî bibê yew'Barones Christine Blower, sendîkavan Clare Baker, akademîsyen Dr. Radha D‘Souza, akademîsyen Dr. Thomas Jeffrey Miley, nuştox û aktîvîste Rahila Gupta, Sekreterê Mehkemeya Daîmî ya Şaran û doktor Gianni Tognoni tewrê kombîyayîşî bîyî.