Vervatoxa Partîya Demokrasîyî û Têdûştîye ya Şaran (DEM Partî) Ayşegule Dogan derheqê kampanyaya ke do vera destsernayîşê Şaredarîya Colemêrgî bêro destpêkerdene merkezê pêroyî yê partîya xo de kombîyayîşê çapemenîye kerd.

Ayşegule Dogan vera destsernayîşê Şaredarîya Colemêrgî nêrazîbîyayîş mojna û da eşnawitene ke ê do vera xespkerdişê îradeyê şarî 13ê hezîrane saete 15:00 de Colemêrg de mîtîngêkî girdî bikerê.

Ayşegule Dogan wina veng da: ''Ma şima pêrune semedê mîtîngê girdî yê Colemêrgî pawenê. Kam ke xo semedê edalet, azadîye, têdûştîye, pîya ciwîyayîşî, hurmet û wayîrvejîyayîş îradeyê şarî berpisîyar hîs keno ma veng danê ci ke wa tewrê mîtîngê Colemêrgî bibo. Ma her hetê Tirkîya ra pê teyara, otobus û wesayîtan verê xo bidê Colemêrgî. Reyna do 14ê hezîrena de zî verê Şaredarîya Akdenizî ya Mersinî de têhetameyîşê şarî bêro kerdene.''