DEM Partî seba weçînayîşanê herêmîyan ê 31ê adare xebatanê xo rê dewam kena.

Çewlîg

Rêxistina DEM Partî xebatanê xo yê weçînayîşan rê bêmabên dewam kena. Wekîlê DEM Partî Omer Faruk Hulakuyî, namzedanê Şaredarîya Çewlîgî Çîçeke Ariç û Aydin Burçunî rêxistinê komelê sivîlî zîyaret kerdî. Zîyaretan de seba namzedan paştî ameye waştene. 

Bedlîs 

Qezaya Tetwanî de esnafî ameyî zîyaretkerdene. Wekîla DEM Partî ya Erziromî û Namzeda  Şaredarîya Îstanbulî ya DEM Partî Merale Daniş Beştaş namzedanê Şaredarîya Tetwanî Belkiza Beştaş Epozdemir û Mûmîn Erol reyde esnafî zîyaret kerdî. Beştaşe tîya de xîtabê şarî kerd û vat: ''Ganî ma rayanê xo yê helalan bidê, rayanê herêman û weçînitoxanê sexteyan vindarnê.''

Mêrdîn 

Qezaya Şemrexî de namzedan keyeyî û rêxistinê komelê sivîlî zîyaret kerdî. Qezaya Nisêbînî, Dêrik û Mîdyadî de zî namzedanê şaredarîyan ê DEM Partî keye, esnaf, rêxistinê komelê sivîlî û dezgehî zîyaret kerdî. Namzedan waşt ke wa paştî bêra dayene înan.