Ewro Zîndanê Edîrne de Hemserekê HDPyî verênî Selahattîn Demîrtaşî rê cigêrayîş ameyo ferzkerdene. Avûkatê Demîrtaşî Ramazan Demîrî derheqê babete de agahîyî dayî û da zanayene ke bi emrê Wezîrîya Edaletî Demîrtaşî rê ame ferzkerdene ke her ke koxûşî ra vejîyeno wa solanê xo vejo.

Demîrtaşî naye ser o ferzkerdiş protesto kerd û pare kerd ke o do hinî nêşoro pêvînayîşan.

Heyetê Rayberdişê Merkezî yê DEM Partî cigêrayîşo ke Zîndanê Edîrne de Selahattîn Demîrtaşî rê ameyo ferzkerdene şermezar kerd.

DEM Partî vat: ''Embazê ma Demîrtaş wexto ke şino pêvînayîşî û yeno ci rê cigêrayîş yeno ferzkerdene. Ma nê ferzkerdişî û 'şiknayîşê rûmetî' yê vera Demîrtaşî red kenê. Nê tedayê ke zîndanan de zêdîyayê seba astengkerdişê xebatanê ma yê weçînayîşî yenê kerdene. Mesuldarê nê kerdişan zî Wezîrîya Edaletî û îqtîdar ê.

Sey DEM Partî ma xebatanê xo yê weçînayîşî rê dewam kenê ke embazê ma yê tepişteyî zî tewrê nînan benê. Ganî bizanîyo ke nê bêhuqûqîyan do pê ma nêeşkê. Ma veng danê ke nê kerdişî wa cade biqedê. Ma venga muxalefetê demokratîkî û rayaumûmîye danê ke vera nê kerdişan têkoşîn bikerê.''