Hemseranê DEM Partî Tulaye Hatimogullari û Tuncer Bakirhanî bi wesîleya 21ê Sibate Roja Ziwanê Dayîke ya Dinya  kirdkî zî tede bi hewt ziwaman de UNESCOyî rê mektûb şawit.

Metkûbê Hemserekanê Pêroyî yê DEM Partî yo ke bi kirdki-zazakî ame nûştene wina yo:

Heqê perwerdeyîya bi ziwanê dayike heqêko bingeyin yê merdiman o û no heq hetê Neteweyê Yewbîyayeyî (NY) ra ameyo qebulkerdene û heme dewletê ke endamê NYyî ser o no heq ameyo ferzkerdiş. Labelê no heq Tirkîya de seba şarê Kurdan, Ereban, Ermenîyan, Çerkesan, Lazan yeno xesbkerdene. Xeynê ziwanê Tirkî ziwanê bînî yê ke nê cografyayî ser o yene qiseykerdene bi haweyêko sîstematîk yenê asîmîlekerdene û qedexekerdene. Goreyê Atlasê Ziwanê Cîhanî yê ke Taluke bin de yê Tirkîya de 18 ziwanî çin bîyê yan zî ver bi vindîbîyayîşî şinê. Nê ziwanan ra yew zî Kirmanckîya zaravayê Kurdkî ya.

Asîmîlasyonê ziwanan, polîtîkayê çinkerdişê kulturî sûcêkê merdimîye yo. La Tirkîya wezîfeyanê xo yê pawitişê ziwanan nêana ca û hîna zî nê heqan binpa kena.

Ma sey Partîya DEMî bi minasebetê 21ê Sibate Roja Ziwanê Zikmakî ya Cîhanî reyna veng dane sazîya şima ke şima wezîfeyê xo bîyarê ca. Ganî şima heyetêk bierşawê Tirkîya û derheqê binpakerdişê heqê ziwanî de Tirkîya de cigêrayîşêk bidê destpakerdene. Ganî Tirkîya de sere de heqê statuyê ziwanê Kurdkî (Kurmanckî - Kirmanckî) û heqê statuyê ziwananê sey Erebkî, Ermenkî, Suryankî, Çerkeskî, Lazkî, Romankî, Boşnakkî û ziwananê binan bêro dayene. Ganî dewleta Tirkîya şert û mercanê bingeyîyan yê mîyanneteweyîyan bîyaro ca û goreyê nê peymanan têwbigêro. Ganî Dewleta Tirkîya şerhê ke 3 madeyanê (madeyê 17, 29 û 30.) Peymana Heqê Gedeyan ser o ronayê wedarino û wezîfeyanê xo yê Peymane ser o bîyaroca.

Ma sey Partîya DEMî 21ê Sibate Roja Ziwanê Zikmakî ya Cîhanî pîroz kenê.