Çarçewa zîyaretanê roşanî yê partîyanê sîyasîyan de heyetanê Partîya Gelecekî û CHPyî DEM Partî zîyaret kerde. Nêmroje ra dima zî do Partîya Saadetî û DEVA zîyaretê DEM Partî bikerê.

Hetkarê Hemserekanê Pêroyîyan Ozturk Turkdogan, Wekîla Amedî Ceylane Akça, Endamê Meclîsê Partîye Îhsan Seylan heyetî pêşwazî kerdî. 

Endamê Heyetê Rayberdişî û Wekîlê Konya yê Partîya Gelecekî Hasan Ekîncîyî ard ziwan ke Tirkîya de meseleya demokrasîyî ya cidîye est a ke zerarî dana her kesî.

Ozturk Turkdoganî zî vat: ''Ma hêvîdar ê ke proseso newe haştîya Tirkîya do awan bikero.''

Nameyê CHPyî ser Hetkarê Serekê Pêroyî Volkan Demîrî, Endama Heyetê Rayberdişê Merkezî yê Baska Cinîyan Armagane Akyuz, Endamê Heyetê Rayberdişê Merkezî ya Baska Ciwanan Batuhan Cakcakî DEM Partî zîyaret kerde.

Volkan Demîrî vat: ''Weçînayîşan ra dima wisar ame welatê ma.''

Turkdoganî vat: ''Weçînayîşanê 31ê Adare seba demokratîkbîyayîşî mesajêko xurt da. Mesajê caardişê haştîya zereyî dîya.''

Demîrî vat: ''Seba ke her kes nê welatî de bi azad û têdûştî biciwîyo destê ma ra çi bêro ma do bikerê.''