Weçînayîşanê herêmîyan de seba Şaredarîya Riha namzedê DEM Partî Gulşene Ozer û Celalettîn Erkmen ê. DEM Partî Riha de heta nika partîya diyîne bîya la nika xîret kena ke şaredarîyanê qezayan reyde Şaredarîya Riha zî qezenç bikera.

Seba şaristanî namzedê AKPyî şaredaro nikayên Zeynel Abîdîn Beyazgul o û namzedê Partîya Yeniden Refahî (YRP) zî Mehmet Kasim Gulpinar o.

Rihayîjano ke ma rê qisey kerd, pare kerd ke AKP Riha de xebatanê taybetan keno  la Zeynel Abîdîn Beyazgulî heta nika xizmetê şarî nêkero. Şaristan de verê buroyanê AKPyî de zî qerebalixî çin ê. Yeno îfadekerdene ke Beyazgul zîyaretanê xo de tim raştê nêrazîbîyayîşê şarî yeno. Hetê bînî ra wina pawîyeno ke şaristan de rayê AKPyî do şorê namzedê YRPyî.

Namzedanê DEM Partî ta Celalettîn Erkem şaristan de hol şinasîyeno û eleqeyê şarî anceno. Goreyê anketan şaristan de kam se ra 35ê rayan bigêro do ser bikewo.

Celalettîn Erkmenî derheqê xebatanê înan de ANFyî rê qisey kerd. Erkmenî da zanayene ke DEM Partî şaristan de partîya diyîn a û vat: ''Weçînayîşê verênî de ma 8 şaredarîyê qezayan girewtbî la YSKyî weçînayîşê hîrê qezayan betal kerdî û nêdayî ma. ''

Erkmenî bale ante ser ke nika Riha de hîrê partî lewe de yê û îfade kerd ke seba ke YRKyî namzedê xo veto şensê DEM Partî zî zêdîyayo. Erkmenî vat: ''Seba ke YRPyî rayê ke AKPyî ra şinê do bigêrê ma bişens ê. Seba ke sîyasetê AKPyî aciz bîyo, hêzê ci yê çareserîye nêmendo, weçînayîşanê herêmîyan de mexlûb beno bin keweno. Hinî AKP nêeşkeno nê şaristanî îdare bikero.''

Erkmenî ard ziwan ke ferasetê înan ê şaredarîye ê partîyanê bînan ra cîya yo û vat: ''Ma do şarê xo reyde Riha îdare bikerê. Ma do dizdîye nêkerê û nêverdê ke çew dizdîye bikerê. Ma do îmkananê şaredarîya seba şarî bişuxilnê. Ma do seba ciwanan merkezanê kulturî awan bikerê, kooperatîfan awan bikerê û zîretî aver berê. Kadroyê ma û tecrubeyê ma est ê.''