DEM Partî çarçewa xebatanê weçînayîşan de di baskan ra kombîyayîşê şarî Şemzînan û Erdexan de dayî destpêkerdene. 

Şemzînan

Qezaya Şemzînanî ya Colemêrgî de bi beşdarîya Hemserekê DEM Partî Tuncer Bakirhanî hem kombîyayîşê şarî hem zî akerdişê buroyê weçînayîşî ameyî kerdene. Şarî bi coşî heyetê DEM Partî pêşwazî kerd.

Bakirhanî Şemzînan de pare kerd ke ê do qetîyen qeyûman bişawê û vat: ''Îqtîdar ancax bii hîleyan eşkeno. La rewşa ma bihêz a. Ê kesê ke kurdan nêhesibnenê û zîndanan de pûç kenê ma do 31ê adare de cinî û ciwanan reyde derse  bidê înan.''

Qiseykerdişan ra dima buro ame akerdene. Bakirhan û heyet pîya derbazê qezaya Geverî bîyî.

Erdexan

Hemsereka DEM Partî  Tulaye Hatîmogullari û heyetê ci Meydanê Hptan Kentî ya qezaya Mêrdinî de kombîyayîşê şarî kerd. Şarî bi konvoyan, çepik û sloganan heyet pêşwazî kerd. Namzedê Şaredarîya Erdexanî yê DEM Partî Serkan Yilmazî kombîyayîş de qisey kerd û ard ziwan ke DEM Partî do welat de têdûştîye, haştîye û edaletî bîyara ca.

Tulaye Hatîmogullari bale ante xoverdayoxîya şarê qeza ser û îfade kerd ke seba Erdexanî projeyê înan zaf û ê do namzedanê xo reyde nê projeyan bîyarê ca. Hemsereke vist vîrî ke Licikê Erzînganî de new kedkarê madenî hema zî binê erdî de yê û Erdexan de zî projeyêko winayên est o. Hemsereke vat: ''Ma do rayîr nêdê nê madenî.''

Heyetî dima pîya qezayî zîyaret kerdî.