Partîya Demokrasîyî û Têdûştîye ya Şaran (DEM Partî) xeylêk bajaran de bi konvoyan fînalê xebatanê xo yê weçînayîşê 31ê adare kerd.

Amed de bi seyan wesayîtan konvoyo gird ame kerdene. Verê konvoyî şaro ke herêma  Gozelî de ame têhet bi muzîkê wesayîtê weçînayîşî govende girewte.

Bi hezaran kesan wesayîtê xo bi alayanê DEM Partî xemilnayî û Amedî ra heta verê banê DEM Partî tur eşt. Şarî paştî daye konvoyî. Namzeda Şaredarîya Bajarê Pîlî yê Amedî Serra Bucak semedê şuxulnayîşê rayan û wayîrvejîyayîşê sindoqan veng da. Namzed Dogan Hatunî zî vist vîrî ke sindoqî serê sibayî saete 07.00 de benê a û 16.00 de qefilyenî.

Çewlîg de zî Rêxistina DEM Partî rayraşîyayîşêk organîze kerd. Namzedê Şaredarîye yê Çewlîgî Çîçeke Ariç, Aydin Burçun û Wekîlê DEM Partî yê Çewlîgî Omer Faruk Hulaku zî tede bi slogana “Jin Jiyan Azadi”, “ DEM do bêr her çî bibedilno” rayraşîyayîş ame kerdene.

Dêrsim de zî Îtîfaqê Dêrsimî  roja peyêne ya xebatanê weçînayîşî de bi seyan wesayîtan konvoy viraşt. Şarî bi çepik û tîlîlîyan paştî daye konvoyî. Namzedê Şaredarîya Dêrsimî Birsene Orhan û Cevdet Konakî  qiseykerdişanê xo de mesajê serekwtişî dayî.

Reyna buroyê weçînayîşî de mesajo ke Namzeda Şaredarîya Bajarê Pîlî yê Anqara Gultane Kişanak şarê Dêrsimî rê şawit, ame wendene.

Êlîh de zî bi seyan wesayîtan konvoy ame kerdene. Şarê Êlihî zaf eleqa mojna konvoyî.