Demîrtaş: AKPyî verî ra hîna bitehluke sîstemêk awan kerd

Selahattîn Demîrtaşo ke sey rehîn yeno tepitşene ard ziwan ke AKPyî verî ra bitehluke yew sîstemêk awan kerd û vat şima hezar hebî muebetî zî bidê ma nêeşkenê vernîya ma bîgerê, ma do nê welatî îdarê bikerê.

Hemserekê Pêroyî yê HDPyî yo verên Selahattîn Demîrtaşo ke sey rehîn yeno tepiştene, Zîndanê Edîrne ra bi rayîrê sîtemê SEGBÎSî tewrê mehkemeya xo ya ke Anqara de ameye viraştene bi. Xeylêk sîyasetmedarî zî sey taqîpkerdoxan tewrê mehkeme bîyî.

Pawitişê Demîrtaşî ra tayî  beşê ke vejîyayî vernî wina yê:

''Nika na salona roniştişî de pêserameyîşê ma semedê hukmkerdişî nîyo. No yew kombîyayîşê xebatê çînkerdişê muxalefetî yo ke  wa vernîya hukmatê AKPyî û bitaybetî zî Serekê Pêroyî yê Recep Tayîp Erdoganî bêro akerdene û amancê înan ê sîyasîyî bêrê caardene.

Dewlete badê 15ê temmuze newe ra nêameye înşakerdene. Heme dezgehî ameyî tasfîyekerdene. Ez bala şima biancê sîstemo ke newe nîno înşakerdene. Sîstemê kaosî herinda ci de yeno cakerdene. Nê dewayî zî seba ke no rejîm ya zî sîstemê kaosî herinda sîstemê Qanûnê Bingeyênî yê Komare de bêrê caakerdene ameyî akerdene. Kam ke verê Erdoganî de beno asteng vernîya ci yena girewtene.

AKP pabesteyê xo yo, pabesteyê dewlete nîyo. Têna pabesteyê kesêk o. AKP nika verî ra hîna zaf bitehluke yew sîtemêk awan kerd. Linga ci ya hukm, medya, merdimanê karî û brokrasî esta. Qetilkarî bi halê holî yenê veradayene û êyê ke semedê heq huquqî têkoşîn kenê yenê cezakerdene.

Na sîtemê yew merdimî yo ke şima pawenê rîyê krîzê ekonomî yê înan ra şar hînî komkerde xo kişeno. Na sîtemo ke yeno waştene ke bêro ronayene û şima zî paştî danê ci sîstemê Hîtlerî yo. Nika her çî pabesteyê yew merdimî yo. Heta ewro îqtîdaro ke nêrijîyo çîn o. Erdogan zî do şiro.

Ma do seba demokrasî xover bidê û ser bikewê. Ez û embazê xo do nê welatî îdare bikerê. Şima yew ney hezar hebî muebetî zî bidê mi nêeşkenê mi vindarnî. Ma do wextêko kilm de  heme şarî  destê bidê yew bînan û welatî newe ra înşa bikerê.''