Hemsereko verên ê HDPyî Selahattîn Demîrtaşo ke Zîndanê Edirne de sey rehîn yeno tepiştene hesabê xo yê medayaya sanale ra derheqê şewatê Dêrsimî de eşkerayîye daye.

Demîrtaşî vat: ''Dêrsim de sebebê hewnanêkerdişê şewatî kêmîye nîya. Zafê daristanê a herême bizanayîş yenê vêşnayene û destûr nêdîyeno ke şar şewatî hewna bikero. Na polîtîkaya zanayîye û fermî ya ke bi des serran o yena rayraberdene. Na raştîye her kes zano la çi heyf kes nêano ziwan. 38 de qey Dêrsim ame bombardumankerdene eynî sebebî ra daristanî zî yenê vêşanyene.. Zerrîya mi senî ke Mîlas, Marmaris, Manavgatî de ya, Dêrsimo ke felaket de zî cîya yeno dest girewtene, Başkale û Şemzînan de zî şarê ma reyde ya.  Ma do peynîya nê polîtîkayan ê ke şar û welatî cêser fînenî bîyarê.  Semedê nayî ganî heme kesê ke haştîye û demokrasîyî wazenê destê yewbînan tepişê û têhet vinderê. Senî ke Manavgat ê ma pêrun o Dêrsim zî yê ma yo. Heta ke no zanayîş hekîm mebo ma nêeşkenê seyyewbînîye, edalet û haştîye bîyarê welat.''