17ê tebaxe de operasyonê leşkerî ra semedê deweka Denzî û dewa Kurukaymakî ya Xozatî de şewat vejîyabi. Semedo ke şewatî rê mudaxele nêame kerdene şewat verî vilayê Pulurî bi. Dîya zanayene ke şewat nika zî resa merkezê Dêrismî.

Nêrazîbîyayîşan ra dima şewatî rê mudaxele yeno kerdene le şewat vera vila beno. Vizêr zî Gelîya Munzurî de şewat vejîyabi.

Şewatê Gelîya Munzurî bi hawayêkê bitesîrî zaf les vila beno. Serê sibayî şarê herême tîmanê îtfaîya reyde tewrê hewnakerdişê şewatî bi.

Hetê bînî ra Serekê AKPyî yê Dêrsimî Sercan Ozaydinî medyaya dîjîtale ser o fotografêk pare kerd û îdîa kerd ke hewayî ra mudaxeleyê şewatî yeno kerdene. Fotograf de hasmênê Dêrsimî de helîkopterêkê şewatî aseno. La eşkera bi ke fotograf fotomontaj o.

Çewlîg

Deweka Xarsakî ya dewa Conagî ya qezaya Xorxolî ya Çewlîgî de zî vizêr şewat vejîyabi. Şewat pê tesîrê vayî beno pîlêr. Warê daristanan ra dû berz beno.