Dêrsim de 13 rojan ra dima peynî de hewayî ra mudaxeleyê şewatî ame kerdene. Şewatî 17ê tebaxe de dest pêkerdbi. Şewatî verî Xozatî de dest pêkerdbi dima zî vilayê Pulurî bibi. 13 rojan selahîyetdaran û hêzanê dewleta tirke nêverda ke şar, dezgeh û sazgehê Dêrsimî mudaxeleyê şewatî bikerê. 

Hemsereka Partîya Herêman ê Demokratîkan (DBP) Salîha Aydenîz, wekîlê HDPyî Mehmet Togrul û Mehmet Ruştu Tîryakî zî tede heyetêk ame Dêrsim. Heyetî verî Hêzanê Demokrasî û Kede yê Dêrsimî reyde herêma Karaoglanî de eşkerayîyêke daye.

Serekê Merkezê Cigêrayîşanê Dêrsimî (DAM) Selam Yeşîlgozî bale ante ser ke Dêrsim her serre yeno vêşnayene û rijnayene. Yeşîlgozî vat: ''Nê şewatî vera cografya, daristanan, ziwan, kulturê ma hêrişê topyekûnî yê.''

Salîha Aydenîz zî pare kerd ke cografyaya Kurdîstanî binê nameyê 'asayîşî' de yena vêşnayene. Aydenîze vat: '' Nê şewatî netîceya polîtîkaya dişmenîya vera kurdan ê. Dewlete pê nê polîtîkayan kena ke Dêrsim de çew nêmano. Ma do vera nînan tim têkoşînê xo rê sey verî dewam bikerê.''

Heyetî eşkerayîye ra dima waşt ke şoro warê şewatî la Aslica de leşkeran pê bahaneya bira walîtîye heyet asteng kerd . Heyet derbazê qezaya Pulurî bi.