Denîz Bulbuno ke hetê dewleta tirke ra bi hemkarîya PDKyî ame qetilkerdene, roja 40. ya şehadete ci de Hewlêr de ame yadkerdene. Merasîmê yadkerdişî de semedê vînayîş û cezakerdişê kiştoxan ame vengdayene.
Hewlêr de vizêr bi tewrbîyayîşê endamanê KNKyî, nuştox, roşnvîr û aktîvîstan semedê Temsîlkarê KNKyî Denîz Bulbunî yo ke 40 rojî verî ame qetilkerdene, merasîmê yadkerdişî ame organîzekerdene.
Merasim de ame vatene ke Hewlêro ke sey paytextê Herêma Kurdîstanî yeno zanayene de qetilkerdişê Denîz Bulbunî ra dima 40 rojî ravîyartî la hema kiştoxî nêameyî tepiştene û muhakemekerdene û hukmat ame rexnekerdene.
Qiseykerdişan de bale ameye antene keda Denîz Bulbunî ya semedê pawitişê ziwanî kurdî ser.
Qiseykerdoxan vist vîrî ke hukmat û hêzê asayîşî berpirsîyar ê endamanê KNKyî bipawê û vat, “Ma dewaya şehîdkerdişê endamê xo nêzdî ra teqîp kenê. Hêzê asayîşî wa helêke cuwa ver kiştoxan û înanê ke engişta xi nê hêrişî de est a, eşkera bikerê. Eke kiştox û hêzê ke peyê nê hêrişî de eşkera mebê, ma do na dewa bikirişê dîwananê mîyanneteweyî.”
