Seba ke waştbi wa derheqê hêrişanê kîmyewîyan ê vera Herêmanê Pawiitşî yê Medya  de cigêrayîş bêro kerdene Sereka Konseya Merkezî ya Yewîya Tabîbanê Tirkan (TTB) Şebneme Korur Fîncanci amebî tepiştene. Roniştişê diyînî yê dewaya Fîncanci ewro Mehkemeya Cezaya Giran a 24. ya Îstanbulî de ame kerdene.

Mehkeme de Avukat Bariş Yavuzî Qirkerdişê Roboskî zî vîst vîrî û vat zaf qirkerdişî ameyî kerdene. Yavuzî vat: ''Sûcî rê sûc vatiş, sûc nîyo. Vanê derheqê kurdan de qisey mekerê. Eke binpaykerdişê heqan est o, çîyêk ameyo înan ser, nê mevajê. La heqê kurdan est ê û do tim bibê. Şebneme Korur Fîncanci sûc nêkerdo.''

Avûkatanê Fîncaci  ra Meriç Eyupolguyî zî dewa sey dewaya polîtîkî name kerd û vat: ''Fîncanci sey pîsporêkî têna derheqê babete fîkrê xo ard ziwan, ganî cade bêro beraatkerdene.'' Eyubogluyî ard ziwan ke dadger eşkera het tepişeno û vat ê mehkeme red kenê.

Mehkeme semedê ercnayîşê waştişê avûkatan mabên da roniştişî. Mehkeme dima ra qerarê xo eşkera kerd. Waştişê avûkatan ame redkerdene.  Derheqê Fîncanci de qerarê dewamê tepiştişî ame dayene û roniştişo bîn 11ê çeleyî rê ame peyde eştene.