Operasyonê herêma Besta yo ke 10ê nîsane de ame kerdene de verî ame vatene ke gerîlayê HPGyî Firat Şîşman dinyaya xo bedilnaye la dima ra hetê Wezîrê Karanê Zereyî yê Tirkî Suleyman Soyluyî ra dîya eşnawtene ke Şîşman weş o.

Şubeyê Komeleya Heqanê Merdiman (ÎHD) yê Îstabulî û keyeyê ci derheqê rewşa gerîlayê HPGyî Firat Şîşmanî de eşkerayîye daye. Kombîyayîşo ke online ame kerdene Hemsereka ÎHDyî Şubeyî Gulserene Yollerî, keye û avûkatê Şîşmanî tewrê ci bîyî.

Yolerî ard ziwan ke derheqê Şîşmanî de zanayîş nêdîyeno keye û avûkatanê ci û vat no zî beno sebebê zêdbîyayîşê qesawetan. Yolerî vat selehîyatdarî ganî cade verê heqanê huqûqîyan ê Şîşmanî akerê.

Waya Şîşmanî Leyla Kiliç zî bale ante ser ke ê yew menge yo birayê ci ra xebere nêgenî û vat: ''Ma verî xebera mergê birayê mi girewt û muracatê Serdozgerîya Şirnexî kerd ke cenazaya xo bîgerê. Dima ra ma semedê testê DNA gonî da la hema zî cevabêk nêdîya ma. Wextêk dima ra  ma eşnawit ke  birayê mi weş o. Rixmo ke yew menge ravêrte hema demê destbendkerdişî dest pênêkerdo. Ne ma ne zî avûkatî nêeşkenê xeberêke bigîrê.''

Avûkata keyeyî Newroze Uysale zî bale ante bêhuqîya ke yena kerdene ser û vat: ''Ma nêzanê Şîşman ça de yo rewşa ci senîn a. Na bêhuqûqîye ya. Ma muracatê Dadgerîya Ceza ya Sulhî ya Şirnexî ked înan verî vat, rewşa ci giran a û dima ra zî vat Şîşman  seba ke nêwazeno avûkat û merdimanê xo bivîno, zabitname îmza kerdo. La yew keso ke beşê ciewnîyayîşê giranî de yo senî eşekno wina bikero. Ma zanê ke çîyê winayênî wextê îşkenceyan de yenê kerdene.''

Eşkerayîye de ame vatene ke seba ke xebera mergî dîyaye keyeyî û yew menga yo ke heqîqeqet yeno nimitene pêhesnayîşê sûcî ame kerdene û veng dayene ke wa cadê şertê tedawîkerdişî bêrê caardene no halê bizor tepiştişî bêro qedînayene û goreyê huqûqî bêro têgêrayene.