Tepişteyanê Zîndanê Kurkçulerî yê Adana derheqê Qirkerdişê Parisî yê 23yê Kanûna 2022yî de Sersefîrîya Fransa rê mektubêk şawit. Tepişteyan waşt ke qirkerdiş wa bêro roşnîkerdene û cigêrayene. Tepişteyan ra Mazhar Gulerî bi rayîrê keyeyê xo mektubo ke erşawîyayo sersefîrîye rayaumûmîye de pare kerd.

Mektub de wina yeno vatene: ''Ma bi îtîfaqê AKP-MHPyo ke dişmenîya şarê kurdî keno têrî manenê. No îtîfaq bi taybetî vera şarê kurdî qirkerdişan keno. Pêro dinya vera qirkerdişanê serê kurdan bêveng a. Tirkîya şirîka qirkerdişê 3 embazanê ke Merkezê Kulturê Kurdan ê Ahmet Kayayî de bîyî. Ma hol zanenê ke peyê perdeyê nê hêrişê tarîyî de hêzêk est o. Mesuldara nê hêrişî Fransa ya. Eke qirkerdiş nêro roşnîkerdene şirîkê nê qirkerdişî Fransa ya. Ma venga Fransa danê ke nê qirkerdişî roşnî bikera.''