Komeleya Paştdayîş û Kulturî ya Dêrsimî û Komeleya Elewîyanê Demokratîkan (DAD) Îzmîr de derheqê hêrişê vera Dêrsimî de eşkeraye daye û veng da ke wa operasyonê leşkerî yê ke zirar danê ekolojî bêrê vindarnayene.

Eşkerayîya ke banê ÎHDyî de ameye kerdene Hemserekê HDPyî yê Îzmîrî Berna Çelîk û Çinar Altan û îdarekarê SMFyî zî tewrê ci bîyî. Cayê eşkerayîye de pankarta ''Dêrsim bêwayîr nîyo, destê xo bawerî, kultur û xozaya ma ra biancê'' ame daliqnayene.

Eşkerayîye de bale ameye antene hêrişanê vera bawerî, kultur û xozaya Dêrsimî ser û nê ameyî vatene: ''Îqtîdaro ke Cemxaneyan sey cayê bawerî qebul nêkeno demê peyênî de Unîversîteya Munzurî de binê nameyê xebetanê akademîkan de keno ke komelî ercanê ci ra raqilno. Zîyaretê Serekê Karanê Dîyanetî Alî Erbaşî yê Cemxaneyê Tuncelîyî ramojneno ke senî planê înan ê leymin est ê. Hetê bînî ra bi operasyonanê leşkerîyan komel, xoza, heme ganî û ekolojî binê hêrişî de yê. Yew hewte yo Xozat û Pulur de dormeyê dewan de bombayî yenê varnayene. Vera cografyaya kurdan hêrişo sîstematîk est o.  Ganî nê operasyonî cade bêrê vindarnayene û sere de dîyanet falîyetê heme waqif û komelayan yê dînî Dêrsim de bêrê qedînayene.''