Xebatê Îtîfaqê Dêrsimî bi coşî dewam kenê. Hemsereka Pêroyî ya DBPyî Çîgdeme Kiliçgun Uçar, Wekîla Dem Partî ya Dêrsimî Aytene Kordu û xeylêk endamanê partîye vizêr  qezayanê Pêrtag, Mazgêrdî de tewrê kombîyayîşanê şarî bibî.

Çîgdeme Kiliçgun Uçar programê xo yê roja diyênî ya Dêrsimî de  merkezê bajarî de tewrê xebatan bîyî. Suka Binerdî de esnafan reyde têhetameyîşê  şarî ame kerdene. Hemvervatoxê HDKyî Cengiz Çiçek, Wekîla DEM Partî ya Dêrsimî Aytene Kordu, namzedê Şardarîya Dêrsimî Birsene Orhan û Cevdet Konak û rojnamevan Celalettîn Can û pabesteyê îtîfaqî terê kombîyayîşî bîyî. 

Çigdeme Kiliçgun Uçara ke qiseykerdişê akerdişî yê kombîyayîşî kerd vat Dêrsimî vera polîtîkaya asîmîlasyon û înkarî yê seserran çirey têkoşîn canêverda. Uçare vat Dêrsim de Îtîafaqê Dêrsimî ame ronayene ke no zaf qiymetin o. Dima ra  esnafan qala problemanê xo kerd û namzedan zî projeyanê xo ser qisey kerd.

General Zeng (Yusuf Zeng) o ke nameyanê sembolan ê Dêrsimî ra ya, o zî tewrê aktîvîte bi.Zengî ard ziwan ke o do paştî bido DEM Partî û namzedan reyde govende girewte. Tewrbîyayîşê Zengî û govenda ci bale ante xo ser.

Kiligun Uçar pîya bi heyetêko pîya gureyêne  û bi seyan kesan bi slogananê ''Ma do bi yewbîyayîşî ser bikewê'', Dêrsim ê ma yo, do ê ma bo, jin, Jiyan , azadî heta Medyanê Seyîd Rizayî raya şîyî. Meydanê Seyîd Rizayî de govende ameye girewtene û aktîvîte qedîyaye.

Çewlîg de zî îdareyê Rêxistina DEM Partî ya Çewlîgî, Hemserekê KCDyî Berdan Ozturk, Wekîlê DEM Partî yê Çewlîgî Omer Faruk Hulaku, namzedê Şaredarîya Çewlîgî Çîçeke Ariç û Aydin Burçunî sey heyetêk esnaf zîyaret kerdî. Siba Çewlîgî de do mîtîng bêro kerdene. Heyetî şarî ra waşt ke wa tewrê mîtîngî bibo.

Reyna Amed, Bêdlîs, Wan, Qers,Colamêrg, Mêrdîn, Şirxêx û xeylêk bajaranê bînan ê Kurdîstanî de zî xebatê weçînayîşî bi coşî ameyî domnayene. Şarî zaf eleqe ramojna DEM Partî û vat ê do bi rayanê xo cewabê îqtîdarê faşîstî bidê.