Namzeda Şaredarîya Dêrsimî ya DEM Partî Bîrsene Orhan derheqê weçînayîşanê herêmîyan û asayîşê sindoqan de ANFyî rê qisey kerd.

Bîrsene îfade kerd ke ê do ruhê 8ê Adare û 21ê Adare sindoqan de bivînê û vat: ''Bi rojan o ma meydanan de yê, xebatanê xo bi coşî kenê. Şarê Dêrsimî bi Îtîfaqê Dêrsimî bawer o. Bi taybetî cinî û ciwanî zaf xebitîyenê. Ma venga pêro dêrsimijan danê ke şorê sindoqan ser. Bi taybetî ê dêrsimijê ke teber de yê, wa bêrê raya xo bidê. Seba ney partîya ma her îmkanî peyda kena.''

Bîrsene bale ante ser ke asayîşê sindoqan zî zaf girîng o û vat: ''Ma tedbîrê xo girewtî. Erkdarê ma yê heyetanê sindoqan, muşahîdê ma, çimdarê ma û komîsyonê ma yê huqûqî do mekteban de bibê. Erkê ma yo ke eke cayêk de faşîzmê AKP-MHPyî est bo uca de asayîşî bîyarê ca û wayîrê rayanê xo vejîyê. Ma rayêka xo zî nêdê înan. Ma do prosesî teqîb bikerê. 31ê adare de serkewtiş do bibo ê DEM Partî. DEM bê Dêrsim, Dêrsim bê DEMî nêbeno.''

Bîrsene Orhan da zanayene  ke Dêrsim de verê cû zî îtîfaqî ameybî kerdene la reya verêne îtîfaqêko hende hîra yeno viraştene. Bîrsene vat: ''Seke zanîyeno ke Dêrsimî rê qeyûm amebi tayînkerdene, dima zî partîyêka ma ya doste şaristan îdare kerd. Şarê ma bi îtîfaqê ma bawer o. Vera ma de zî îtîfaqê sîstemî est o. Dêrsim hedefê polîtîkayanê taybetan de yo û raştê asîmîlasyonî yeno. Bi taybetî rojanê peyênan de na rewşe giranêr bîye.

Seke zanîyeno rojanê peyênan de namzedêkê tradîsyono ke serranê 90an de kiştox bi, Meydanê Seyîd Rizayî de vatbi 'Ez elewîyan temsîl kena.' Elewîyî sereyê çewî nêbirnenê, çewî nêkişenê. Ma ferasetê înan hol zanenê. Ê duşkun ê. Seba ke ê şaristanê ma de bîyê namzed nê weçînayîşî ma rê hîna girîng bîyî. Ma dûştê ferasetê înan ê cematan û Tuncelîyî yê. Coka Dêrsim de serkewtiş qîmetîn o. Coka ma vanê ke rayêke zî do kayanê înan bixeripna. Ma do Dêrsim de ser bikewê, şar do ser bikewo.''