Dêrsim de serkêşîya Platfromê Kede û Demokrasîyî de Meydanê Seyîd Rizayî de Roşanê Newroze ame fîrazkerdene.

Serekwekîla Grûba DEM Partî Gulîstane Kiliç Koçyigit, Sereka Pêroyî ya  ESPyî Ozleme Gumuştaş, Serekê Pêroyî yê EMEPî Seyît Aslan û Federasyonê Meclîsanê Sosyalîstan ra Mahîr Gurz zî tede bi hezaran kesî tewrê şayîye bîyî.

Hemwelatîyê ke Kuçeyê Hunerî de ameyî têhet pankartê ''Vera zilm, bêedaletîye û qedexeyan Newroze bimbarek bo'' akerd. Bi def û zûrna govende ameye girewtene û bi kuwayîşê erbaneyan deyîrê azadîye ameyî vatene. Şar bi slogananê“Bijî serok Apo” û  “Jin, jiyan, azadî” ver bi warê Newroze rayra şi. Rixmê varayîşî şarê ke warê Newroze kerd de, mesajê serkewtişê Îtîfaqê Dêrsimî yê 31ê adare da.

Tewrbîyayîşê ciwanan bale ante xo ser. Xeylêk hemwelatîyanê kincê sey kiras-fistan û şal-şepikler dayî xo ra. Nîşanê azadîye û tîlîlîyanê Dayîkanê Haştîye reng da warê Newroze. Reyna bi xeylêk pankartanê cîya cîyayan azadîya fîzîkîye ya Rayberê Şarê Kurdî Abdullah Ocalanî ameye waştene.

Hemserekê DEM Partî yê Dêrsimî Ozcan Gurtaşî vat, ''Wext wextê DEM Partî yo, wextê yewbîyayîş û têkoşînî yo.''

Namzedê Şaredarîya Dêrsimî Cevdet Konakî zî vat, ''Ma binê tecrîdî de yê la ma do 31ê adare de têkoşînî xurtêr bikerê. Dêrsim do 31ê adare de bi coşê Newroze lapata tewr pîle bido faşîzmî ro.''

Reyna qiseykerdoxanê bînan zî bale ante muhumîya Îtîfaqê Dêrsimî ser û vat ê do bi coşê Newroze têkoşînî xurtêr bikerê û weçînayîş de ser bikewê.

Gulistane Kiliç Koçyigit zî qiseykerdişê xo de bale ante xoverdayîşê tarîxî yê Dêrsimî ser û  îqtîdarê AKP-MHPyî sey Dehaqê modernî name kerd. Koçyîgîte Newroza Abdullah Ocalanî selam kerd, ci rê selamî şawitî û vat, ''Ma tim vera zaliman xover da. Ewro Dehaqo modern AKP, MHP, Hîzbulkontra û JÎTEM o. Vera nê îtîfaqî, Îtîfaqê Dêrsimî est o. Dêrsim rayîr nêdano Yezîdan.''

Badê qiseykerdişan ciwanan bi şal şapikan sehne de şîara “Efendino” ya Arjen Arîyî wende. Bi hezaran kesan bi tîlîlî û çepikan keyfweşîya xo mojna. Dima adirê Newroze ame tavistene û coşê şarî zêdîya. Bi hezaran kesan bi deyîranê Gulseven Medar, Alî Dogan Gonultaş û BEKSAVî govende girewte.

Ewro Roşanê Newroze  14 merkezan de bi şîarê "Rabe dema azadî û serkeftinê ye"  ame pîrozkerdene. Dêrsim, Êlih, Bazîd, Panos, Kaxizman, Nisêbîn, Milazgir, Kop, Dihê, Qereçoban, Mêrdinik , Balikesir, Hatay û Mugla de şarî roşanê Newroze pîroz kerd.