Meydanê Seyîd Rizayî yê Dêrsimî de rojnamegeran û Platformê Kede û Demokrasî vera destbendkerdişê 11 rojnamegeran bi eşkerayîyêke nêrazîbîyayîşê xo mojna. Wekîlê HDPyî yê Dêrsimî Alîcan Onlu zî tewrê eşkerayîye bi. Eşkerayîye hetê rojnameger Hidir Yildizî ra ameye wendene.

Yildizî da zanayene ke îqtîdar vera ê kesanê ke ci rê bîad nêkenê hêrişanê faşîzanan keno û vat: ''Dima ke Qanûnê Sansûrî Meclîsî ra derbaz bi 11 embazê ma bi îşkenceyî ameyî destbendkerdene. AKP bi nê operasyonî wazeno mesajî bido pêro komelî û atmosferê tersî awan bikero. Ma sey rojnamegeran qetî vera nê tedayan apey gamêke nêerzê. Rojnamegerîye sûc nîya. Êyê ke wasîyanê Apê Musa, Metîn Goktepe, Îlyas Aktaşî destbend kenê û tepişenê wa xo vîr a nêkerê ke peynîya ci de merg est bo zî ma do heta peynî peyê raştîyan de vazdê.''