Komeleya Heqanê Merdiman (ÎHD) vizêr 30 bajaran de semedê tepişteyanê nêweşan Nobata 'Ma Cuye Pawenê' daye destpêkerdene. Nê bajaran ra yew zî Dêrsim bi. Nobata ke banê ÎHDyî yê Dêrsimî de ameye kerdene Wekîlê HDPyî yê Dêrsimî Alîcan Onlu, Hemserekê HDPyî yê Dêrsimî Nurşate Yeşîl û Îbrahîm Kasun, Serekê EMEPî yê Dêrsimî Ergîn Tekînî paştî daye ci.

Hemsereka ÎHDyî yê Dêrsimî Gonule Sonbahar bale ante rewşa tepişteyanê nêwaşan û şertanê zîndanan ê teberê merdimîye ser û vat: ''Ruh û bedenê tepişteyan binê tehlukeyî de yo. Bi caardişanê keyfîyan heqê esasî yê tepişteyan yenê bipaykerdene. Bitaybetî semedê tepişteyanê nêweşan tabloyê ke merdimî nîyê qewimîyenê. Ganî tepişteyê nêweşî cade bêrê veradayene. Ma semedê tepişteyan merhamet nê edalet wazenê.''

Alîcan Onlu zî ard ziwan ke pêroyê welatî açarîyayo zîndanî û vat: ''Nê welatî de her kes/e ameyo/a esîrgirewtene. Heqê tewr wîjdanî zî hetê îqtîdarî ra  ameyî xespkerdene. Tirkîya zîndano akerde yo û şarê ke tede yê ameyî esîrgirewtene. Xora zextê tewr pîlî zî zîndanan de qewimîyenê. Faşîzm çiwext biwazo komelî esîr bîgiro tim verî zîndanan ra dest pêkeno.''

Ergîn Tekîn zî vat: ''Ma yew zîhnîyetî dir rî bi rî yê ke mîtîngan de mîjdanê viraştişê zîndananê neweyan dano. Îqtîdaro ke wazenê vengê muxalefetî bibirno zîndanan de zextan zafêr keno.''