Hemsereka Pêroya ya DEM Partî Tulaye Hatimogullari, Hemserekê Pêroyî yê DBPyî Çigdeme Kiliçgun Uçar û Keskin Bayindir, Serekê Pêroyî yê EHPyî Hakan Ozturk, Hemserekê Pêroyî yê ESPyî Murat Çepnî, Serekê Pêroyî yê PÎA Mehmet Kamaç, Hetkara Serekê Pêroyî yê EMEPî Sevda Karaca, heyetê CHPyî, hêzanê demokrasîyî vera xespêkerdişê şaredarîyanê Dêrsim û Pulurî Meydanê Seyîd Rizayî de eşkerayîye daye.

Tulaye Hatimogullari ke çalakîye de qisey kerd, nê vatî: ''Dêrsim bi Seyîd Rizayan yeno zanayene; Seyîd Rizayan sereyê xo nêna wa  Dêrsimî sereyê xo nêna war ,do vera zulmê şima de sereyê xo  nêno war.  No îqtîdar hetêkî ra destê xo yê haştîye keno derg û hetê bînî ra qeyûmî tayîn keno. Têna qeyûmî zî tayîn nêkeno cezaya girane daye Hemşaredarê ma Cevdat Konakî.

Colemêrg de dest pêkerd, Esenyurt de domna. Êlih de, Xelfetî û Mêrdîn de û ewro zî Dêrsim de Pulur de îradeyê şarî xesp kerd. Eke şar rixmê hîrê qeyûman îradeyê xo vîjneno wa qesre bizano ke nêeşkena vera îradeyê şarî ser bikewa. Şar vera zulmî xover dano. Ê ke sindoq de sernêkewtî, rixmê xîleyanê xo nêeşkeyê ma nika bi destê hukmî û qanûnê sexteyî ke OHALî ra mendo vanê qey eşkenê ma rê sare bidê wardayene.

Wa şarê Tirkîya bivînê û bizanê ke no banê şaredarîye ke peyê ma de yo binê pawitişê polîsan de yo û dormeyê ci blokanê betonên ameyo girewtene. Gama ke şaredarîyan de qeyûm ca kenê dormeyê ci bi betonan genê. Şaredarîye cayê leşkerî nîyê; şaredarîye keyeyê şarî yê, qereqolî nîyê. Ma sey şarî wazenê rehet bikewê şaredarîyan. Eke şima xo heqdar vînenê, qey şima dest nanê îradeyê şarî ser, dormeyê şaredarîyan beton kenê?  Ê çend qeyûm tayîn  bikerê zî ma do sey şarê Tirkîya sey Dêrsimî xover bidê û wayîrê îradeyê xo bivejîyê. Senî ke Seyîr Rizayî sereyê xo warnêna ma zî do sereyê xo medê war.

Dêrsim de bi îtîfaqê hêzanê demokrasî û şorişgerî şaredarîye ameye destfînayene. Rejîmê qeyûmî vera îtîfaqê ma yê demokratîkî yew hêriş o. Ma do sey şaranê Tirkîya pîya têkoşînî rê dewam bikerê. Qeyûm derba ya, qeyûm dizdîye ya,  qeyûm xespkerdişê îradeyî yo.  Wa vengê ma şiro qesre û şar tîya wayîrê şaredarîyanê xo vejîyeno.

Ma kuçeyanê Dêrsimî ra reyna veng danê û vanê ke ma wazenê meseleya kurdan bi metodanê demokratîkan bêra çareserkerdene. Şima qala kam yew haştîye kenê?  Şima qala haştîya Rojhelatê Mîyanênî kenê û Dêrsimî rê zulm kenê. Şima vanê şima vera Îsraîle la çîyo ke Îsraîl vera Fîlîstînî keno şima zî vera Dêrsimî kenê. Kuçeyan de terorê polîsan est o. Verê kamerayan de eşkera hemwetîyanê xo rê îşkence kenê. Na otorîterîye ya, faşîzm o.

Ez Dêrsimî ra veng dana şaranê Tirkîya bêrê ma vera faşîzmî doşe bi doşe têkoşîn bikerê. Ma pêro pîya xo nê belayê qeyûmî ra bixelisnê. Wextê ci yo ke ma vera nê rejîmê faşîst û otorîterî paştdayîş û têkoşînê xo xurtêr bikerê. Ez tîya ra veng dana Anqara, qesre nê zulmî vindarnê. Nê bizanê ke şima çend hêriş bikerî ma hende têkoşîn kenê. Ma sey hemrayanê Seyîd Rizayan, Deniz Gezmîşan, Mahîr Çayanan, Mazlûman do têkoşînî rê dewam bikerê.''