Partîya Demokrasîyî û Têdûştîye ya Şaran (DEM Partî), Partîya Kede (EMEP), Partîya Karkeran a Tirkîya (TİP), Federasyonê Meclîsanê Sosyalîstan (SMF), Cepheyê Azadîye û Kede (EOC) û Partîzan eşkera kerd ke înan semedê weçînayîşê cayîyî yê 31ê adara 2024î îtîfaq kerdo.

Hetkarê Hemserekanê Pêroyîyan ê Berpirsîyarê Îdareyanê Herêmîyan ê DEM Partî Mehmet Ruştu Tiryaki, parlamenterê EMEPî Îskender Bayhan, Temsîlkarê SMFyî Erdal Ataş, temsîlkarê EOCyî Gokmen Yeşil û temsîlkara Partîzanî Leyla Elma û xeylêk kesî tewrê kombîyayîşî bîyî.

Eşkerayîya hempare de nê ameyî parekerdene: ''Ma şertanê xorîbîyayîşê polîtîkayanê şerî de kewnê weçînayîşanê cayîyan ê 31ê adare. Seba ke şarê Dêrsimî çarçewaya haştîye, seyyewbînîye û demokrasîyî de bibo wayîrê vateyî ma yenê têhet. Seba ke ma bibê vengê cinîyan, ciwanan, kedkaran, seba ke îdareyê cayîyî bibê demokratîk, dêrsimîjî xo îdare bikerê ma yenê têhet. Merkezê Dêrsimî, 7 qezayan û bajarêke ci de seba ke semedê şarê Dêrsimî edalat bêro ca ma sey DEM Partî, EMEP, SMF, EOC, TÎP û Partîzan semedê weçînayîşanê 31ê adare vengdayîşê têkoşînê hemapar û yewbîyayeyî kenê.''

Mehmet Ruştu Tirkîyayî vat: ''Wa her kes bizano ke no proses rehet nêbi. Pêvînayîşanê ma nizdê di aşman kerd derg. Nê demî de zaf xebate ameye kerdene. Ewro seba ke ma semedê Dêrsimî bêrê têhet, seba ke Dêrsim de alternatîfê bînî biafirne, menfeatê Dêrsimî bipawê, temsîl bikerê ma ameyî têhet. Ma do pêro pîya ser bikewê. Çunke hinî semedê Dêrsimî alternatîfo newe est o.''

Reyna tewrbîyayoxanê bînan ê kombîyayîşî zî bale ante muhîmîya yewîye û têkoşînê hemparî ser û mesajê xoverdayîş û serkewişî dayî.