DEM Partî çarçewa xebatanê weçînayîşî yê 31ê adare de Riha û Dêrsim de kombîyayîşê şarî kerdî.

Dêrsim

Hemsereka Pêroyî ya DBPyî Çîgdeme Kiliçgun Uçar, Wekîla Dem Partî ya Dêrsimî Aytene Kordu û xeylêk endamanê partîye qezayanê Pêrtag, Mazgêrd û Perî de şar zîyaret kerd. Şarî eleqeyêko pîl mojna heyetî. Şarî qalê meseleyanê xo kerd. 

Uçare kombîyayîşanê şarî de xîtabê girseyî kerd û vat  weçînayîşan rê tay mendo û venga şarî da ke wayîrê sindoqan vejîyo. Uçare vat: ''Wextê ma de ma berê şaredarîyan her kesî rê akerdî. La qeyûman şaredarîyê ma talan kerdî. Ma do nê weçînayîşan de ser bikewê û ancî xizmetê şarê xo bikerê. Îqtîdarê AKP-MHPyî amadekarîya şerê neweyî keno û seke mijdanîye dano şarî nê îlan keno. Bi şerî meseleya kurdan nêna çareserkerdene. Birêz Ocalan Îmrali de 25 serrî yo tecrîdkerde yo. Ma hema zî peyê deklarasyonê 2013î de yê. Ganî şer nêro kerdene û şarî bieşkê pîya biciwîyê.''

Riha

Riha de qezaya Serê Kanîye de bi beşdarîya sîyasetmedare Leyla Zana, Namzeda Şaredarîya Riha Gulşene Ozer, namzedê Şaredarîya Serêkanîyê Rahşane Yazar û Ugur Kahraman kombîyayîşê şarî ame kerdene. Kombîyayîş dima vurîya mîtîngî. 

Leyla Zana tîya de qisey kerd û vat: ''Qet yew zulm heta peynî do dewam nêkero. Ma do azadîya xo bivisnê destî. Birêz Abdullah Ocalan eşkeno bi felsefeya xo meseleyanê şaran çareser bikero. Xîret yeno kerdene ke şarê ma ziwan û kulturê xo ra dûrî bikewo û bêro qetilkerdene. La ma do rayîr nêdê ney.''