Dêrsim de vera xespkerdişê Şaredarîyanê Dêrsim û Pulirî çalakîyî dewam kenê. Wekîla DEM Partî ya Dêrsimî Aytene Kordu, Serekê EMEPî yê Dêrsimî Ergîn Tekîn û Vervatoxa SMFyî Evrîme Konak derheqê darbeya qeyûmî de ANFyî rê qisey kerd.

Aytene Kordu vat: ''Hemşaredarê Dêrsimî û Şaredarê Pulirî rê bi lezabezî cezaya zîndanî dîyaye û dima qeyûmî herinda înan de ameyî tayînkerdene. Tîya de huqûq çin o. Vera kurdan û elewîyan tim polîtîkayê dişmenîye yenê caardene. Wa nê walîyanê kolonyalîstan û ferasetê darbekeran ra fek vera bidê. Bi nê kerdişan şima şarê DÊrsimî ceza kenê. Şarê Dêrsimî kuçeyan de yo û vano ke qeyûman qebul nêkero. Ma do têkoşînî rê dewam bikerê.

Ergîn Tekînî vat: ''Ma sey îtîfaqî Dêrsim de ser kewtbî. La Cevdet Konakî rê bi hawayêkê bêhuqûqî ceza dîyaye. 2016 de zî Dêrsimî rê qeyûm amebi û cade dezgehê cinî û ciwanan qefilnabî. Qeyûmî Şaredarîya Dêrsimî vistbî mîyanê denan, ma zanenê ke ewro zî do wina bibo. Dormeyê şaredarîye bi betonî gêrîyayo. Aseno ke polîtîkayê rejîmê tekcamêrdî do dewam bikerê. Dewlete ha teror kena. Vera xespkerdişî xeta têkoşînî ya hîra şert a.''

Evrîme Konak vat: ''Dewlete bi hawayêkê nimiteyî Rewşa Îstîsnayîye îlan kerda. Şaredarîya ma ha binê ablûqa de ya. Dêrsim verê cû zî nê prosesê qeyûmî ra derbaz bî. Qeyûmî o çax zî qetî xizmetê şarê Dêrsimî nêkerd. Şarê Dêrsimî wayîrê şaredaranê xo vdejîyeno û qeyûman nêwazeno. Ma sey hêzanê demokrasîyî tim hetê têkoşîn, çalakî û xebatanê şarê Dêrsimî de yê.''