Endama Koordînasyonê PAJK Aytene Dersima ke ANFyî rê qisey kerd, sere de Newroza Rayberê Şarê Kurdî Abdullah Ocalanî û şarê kurdî pîroz kerde û şexsê Mazlûm Dogan û Zekîye Alkan  de şehîdê Newroze yad kerdî.

Aytene Dersim semedê bajaranê ke binê tesîrê erdlerzî de mendî, dejê xo ard ziwan, serweşîye waşte û vat: ''Netîceya erdlerzî reyna mojna ke dewlete wazena komelbîyayîşî werte ra wedaro, herême bêmerdim bikero. Wa şarê ma nê bizano ke dewlete qet çirey xelasnayoxa şarî nêbîye, hetkarîya şarî nêkerde, do mekero zî.''

Dersimî bale ante muhîmîya paştîdayîşê şaran ser û vat: ''Şarî têna eşkenê bi wayîrvejîyayîşê yewbînan, darbanê xo bipêşê, payra bimanê. Wextê erdlerzî de verjî şarî, cinîyî vazdayî warê erdlerzî.''

Aytene Dersim xoverdayîşê cinîyan ê 8ê Adare silam kerd û vat: ''Newroze de no têkoşîn do bêro tacîdarkerdene. Komel bi xoverdayîşî eşkeno dejanê xo şenik bikero. Xora Newroze yewbîyayîş, paştîdayîş û xoverdayîş a. Şarî eşkenê pêro pîya roşanê xo bimbareke bikerê û yewbînan ra hêz bigêrê.''

Dersimî bale ante vîjnayîşanê Tirkîya û Vakurê Kurdîstanî ser û vat: ''Dewleta tirke seba ke îqtîdarê ci ser bikewo, do her qede xîleyan bikero û îradeyê şaran nas mekero. Îqtîdarê AKP-MHPyî bîyo belayê sereyê şarî. Seba ke nê belayî ra bêro xelisnayene gerek xoverdayîş bêro xurtkerdene.''

Aytene Dersim vist vîrî ke têgêrayîşê azadîye heta ewro bi xoverdayîşî ame û vat: ''Felsefeya ma cuya ya tewr bingeyî aya ke ma nê tradîsyonê xoverdayîşî bidê domnayene. Emser hedefê ma azadîya fîzîkîye ya Rayber Apoyî ya.''