Her çiqas hukmatê AKP-MHPyî vajo 'Ekonomî hol a' zî krîzo ekonomîk her roje beno giranêr. Şarê Dêrsimî derheqê krîzê ekonomîkî, zêdînayîşê vayan û farurayan de qisey kerd.

Hemwelatî Mehmet Çelîkî vat: ''Ma 63 TL dayêne 5 kîlo rûnî, nika ma 133 TL danê ci. Ma pêro pereyê xo danê faturayan. Seba ke vayî zaf zêde yê, ma nêeşkenê meywe û sebze bihêrînê. Dolar 18 ra bi 11 TL la fîyatê berheman hema zî zaf zêde yê.''

Mehmet Demîrtaşî ard ziwan ke seba ke pere çin o nêeşkeno nanî zî bigêro û vat: ''Meaşê min o teqawutî ma rê nêvejîyeno. Qaşo înan meaşê ma zêdîna la hema zî fîyatê berheman zêdîyenê.''

Îbrahîm Bozkurtî vat: ''Têna meaşê min ê kokimîye esto. O zî cara qîm nêkeno.''

Kazim Kaplanî vat: ''Welat de krîzo ekonomîk esto. Selahîyetdarî vanê 'La şima pê dolarî meaş gênê?' Dolar xora her çî rê tesîr keno. Çunke no welat pabesteyê teberî yo. Ciwanê ma pê halê xo qayîl nîyê.''

Hasan Erkî îfade kerd ke ê nêeşkenê debara keyeyê xo bikerê û vat: ''Hêvî çin a, rewş xirab a û nêna raştkerdene.''

Tekîn Canî vat: ''Ma binê tesîranê vayan de mendî. Eke îqtîdar şoro beno ke ekonomî bena holêr.''