Hemsereka KCDyî Leyla Guven û Hemsereka HDPyî ya Amedî Hulya Alokmen vera cezaya resnayîş û pêvînayîşî ke seba ke kurdkî deyîrî vatî û govend girewta dîyaya înan, îtîraz kerd.

Îtîrazo ke vera qerarê îdareyê Zîndanê Qefilnayeyî yê Cinîyan ê Xarpêtî ame kerdene  ewro sey roniştişî ame cipersayene. Guvene û Alokmene ke tewrê roniştişî bîyî waşt ke xopawitişê xo kurdkî bikerê. Dadgerî vat seba ke Guvene û Alokmene tirkî zanê ganî ê bi ucretê tercumanî bidê, têna wina eşkenê kurdkî qisey bikerê. Wird sîyasetmedaran no qebûl nêkerd. Dagerî seba ke înan ucretê tercumanî nêgirewt xo ser no sey ''heqê xo yê qiseynêkerdişî şuxulna'' evrakan de da nuştene.

Avûkat Serdar Çelebî waşt wa cezaya dîsîplînî bêro wedaritene. Dadgerîye qerar girewt ke wa dimenê kamera bêrê waştene û dima ra dosya dozgerîye rê bêro şewetene.