Serekwekîla Gruba DEM Partî Gulîstane Kiliç Koçyîgît derheqê rojdemî de Meclîs de eşkerayîyêke daye.

Ercnayîşê Gulîstane Kiliç Koçyîgît wina yê:

‘’Paketa Muhakemekerdişî ya 10ine do bêra Meclîsî. Seba demokratîkbîyayîşê Tirkîya ganî tepişteyê ke bi neheqî zere de yê vera bidîyê. Tena derheqê înfazî û zîndanan de nîyê seba pêro sîstemî vurîyayîş lazim o. Temamîya sîstemê muhakemekerdişî ganî serî ra heta binî bêra ercnayene. Seba ke haştîye bêra welatî ganî meseleya kurdan bêra çareserkerdene. Seba ney ma partîyan de qisey kerd. Ma ceza de edalet, înfaz de têdûştîye wazenê. Zîndanan de bi des hezaran tepişteyê sîyasîyî est ê. 

Vengdayîşê Birêz Ocalanî ra nata prosesêk qewimîyeno. PKKyî zî kongreya xo kerde. La seba çareserîye ganî Meclîs de mutabeqatêko hîra bêro kerdene. Birêz Ocalanî zî waşt ke wa Meclîs de komîsyonêk bêro awankerdene. Heyetê ma naye ser o partîyan zîyaret keno. Ganî nê komîsyonî de rêxistinê komelê sivîlî, nuştoxî, akademîsyenî, rojnamegerî zî cabigêrê. No komîsyon ganî şefaf û demokratîk bibo û hetê Meclîsî ra bêro îdarekerdene.

Ganî bi lezî roşanî ra verî waştişê ma yê serê sîstemê muhakemekerdişî bêrê caardene. Ganî paketa muhakemekerdişî cewab bida pawitişanê komelî û zîndanan.’’