Hemsereka Pêroyî ya DEM Partî Tulaye Hatîmogullari derheqê prosesê nikayênî û nîqaşanê serê Qanûnê Bingeyîyî de ajansê ma rê qisey kerd.

Tulaye Hatîmogullari dîyar kerd ke proses seba haştîya Tirkîya zaf girîng o û ganî nê îmkanê pîlî bişuxilîyê. Tulaye vat: ‘’Vengdayîşê Birêz Ocalanî, kongreya PKKyî û prosesê peyê nînan seba vurîyayîş û vurnayîşê Tirkîya girîng ê. Coka ganî îqtîdar, dewlete, muxalefet û pêro beşê komelî bi cidîyetî nêzdîyê prosesî bibê. Sey Bahçelîyî Birêz Ocalanî zî pêvînayîşê xo de vatibi ke ganî Meclîs de komîsyonêk bêro awankerdene. 

Ganî Meclîs bi hawayêkê fermî erkê ney bigêro xo ser. Haştîye û çareserîya meseleya kurdan ganî Meclîs de bêrê caardene. Ma destpêk de partîyê muxalefetî zîyaret kerdî, ma do partîyanê îqtîdarî zî zîyaret bikerê û agahîyan bidê şarê xo.’’

Tulaye bale ante nîqaşanê serê Qanûnê Bingeyînî ser û vat: ‘’Seba averşîyayîşê nê prosesî ganî tay hemleyî bêrê kerdene. Ganî ma nîyetê samîmîy bivînê. Mîsal ganî her kes bieşko birêz Ocalanî de pêvînayîş bikero, ganî tepişteyê nêweşî û tepişteyê ke înfazê înan temam bîyê vera bidîyê. Ganî Qanûnê Têkoşînê vera Terorî zî bêro vurnayene. Çunke Tirkîya de pêro muxalîfî bi vateyê ‘terorî’ yenê muhakemekerdene. 

Nîqaşê serê vurnayîşê Qanûnê Bingeyîyî rojdemê ma yo sereke nîyê. Armancê ma yo sereke hemleyê demokratîkbîyayîşî yê. Coka ganî kesê weçîniteyî yê sey Ekrem Îmamogluyî abigêrê karê xo ser û qanûnê qeyûman bêro wedaritene. Tirkîya nika hewcedara demokrasîyî ya.’’

Tulaye îfade kerd ke Sûrîye de rejîmê Şamî vera elewîyan, dûrzîyan û xirîstîyanan qirkerdiş keno û ganî modelê Rojawanî ‘’Îdareyo Xoser’’ pêro Rojhelatê Mîyanênî de bibo nimûne. Tulaye vat: ‘’Sûrîye ganî bi lezî Qanûnê Bingeyî yê demokratîkî amade bikero.’’

Tulaye ard ziwan ke prosesê haştîye yê Tirkîya do tesîrê pêro welatî bikero û vat: ‘’No proses eke ser bikewo do bieşko tesîrê Sûrîye, Iraq û Îranî zî bikero. Heta pêro Rojhelatê Mîyanênî de eşkeno bibo serkêşê haştîye. Demokratîkbîyayîşê Tirkîya do seba haştîya herême dîyarker bibo.’’